දස වස් සැමරුම

ශතකයක් ඇතුළත ලෝකයේ ඇති වූ, විශාලත්වය අනුව පස්වැනි තැන හිමි කරගත් භූ චලනය 2004 දෙසැම්බර් 26 දින දකුණු ආසියානු කලාපයම දැඩි ව්‍යසනයකට පත් කළ සුනාමියක් නිර්මාණය කළේය. 

උතුරු සුමාත්‍රාවේ බටහිර වෙරළ තීරයට ඔබ්බෙන්  අක්ෂාංශ 3.2 උතුරට හා දේශාංශ 95.82ක් නැගෙනහිරට වූ ලක්ෂ්‍යයේ සිට කිලෝ මීටර් 30ක් පමණ ගැඹුරකදී ශ්‍රී ලංකා වේලාවෙන් 2004 දෙසැම්බර් 26 දා උදේ 6:58:53 ට රිච්ටර් මාපකයේ ඒකක 9.0ක් සටහන් කරමින් සිදු වූ බව කියන කම්පනය නිසා හටගත් සාගර කැළඹීම ශ්‍රී ලංකා වෙරළ තීරයෙන් 4/5ක් ගොදුරු කරගත් බව “ශ්‍රී ලංකාව තුළ සුනාමි බලපෑම“ හෙවත් Sri Lanka Urban Multi-Hazard Disaster Mitigation Project (SLUMDMP) led rapid Assessment of Western and Southern coastline from 29 th December 2004 to 2 nd January 2005 වාර්තාව සඳහන් කරයි.

එකී වාර්තාවේම සඳහන් පරිදි ශ්‍රී ලංකාවට “සුනාමි“ යනු අමුතුම අත්දැකීමක් විය. (TSUNAMY යන වචනය මේ ලියුම්කරු දැනගත්තේ ද, ඒවා සිදුවන ආකාරය ගැන යම් අදහසක් ඇති කර ගත්තේද, ඇතැම් රටවල සුනාමි යනු අපට ගංවතුර ගලන තරමට සුපුරුදු දෙයක් බව වටහා ගත්තේද එදායින් පසුවය.) විහාර මහා දේවිය පිළිබඳ හුටපටය අප දැන සිටියත්, මුහුද ගොඩගැලීමක් යනු දේව කෝපයක් නිසාම පමණක් ඇති විය හැකි නමුත් භෞතික අවකාශය තුළදී අභව්‍ය වූ සිදුවීමක් ම බව අපේ අර්ධ විද්‍යාත්මක දැනුමෙන් ඒ වන විට අපි අවබෝධ කරගෙන සිටියෙමු.

 

අපේ අනවබෝධය නිසා අප කරගත් විනාශය සුළු පටු එකක් නොවීය. පළමුව ආ දැඩි රළපහර බැස යනවාත් සමගම ජල මට්ටම පහළටම ගොස් කිලෝමීටරයකට ආසන්න දුරක් වෙරළ තීරය පුළුල් වූ බව ඇසින් දුටුවෝ කියති. ඒ බව පෙනෙන වීඩියෝ දර්ශන යූ ටියුබයේද ඇත. මෙසේ වෙරළ ඈතට පෑදුනු අවස්ථාවේ එය නරඹන්නට මහ මුහුද මැදට පැන්න අයගෙන බොහෝ දෙනකුට දිවි ගලවාගැනීමට ලැබුනේ නැත. මේ කියන පළමුවැනි රැල්ල සහ දෙවැන්න අතර පැය භාගයක පමණ කාල පරතරයක් තිබුනු බව කියැවේ. කෙසේ වුවද, පළමුවැන්නට වඩා දෙවැන්න බලවත් සහ විනාශකාරී විය.

දිවයින තුළට මුහුද ගොඩගැලීම පටන්ගත්තේ මුලතිව් - තිරිකුණාමලය පැත්තෙන්ය. ටික ටික එය දකුණට ගමන් කළේය. අපි දිනකට පැය 18ක් රේඩියෝ එක අසමු. මුහුද ගොඩගැලීම ගැන ඇතැම් රූපවාහිනී නාළිකාවෝද සජීවී විකාශයන් පවත්වාගෙන ගියහ. එහෙත්, සුනාමියට අසු වූ ජීවිත සංඛ්‍යාව අඩු වීමක් දක්නට ලැබුනේ නැත.

කැසැන්ඩ්‍රා ක්‍රොසින් චිත්‍රපටය සිහි ගන්වමින් අම්බලන්ගොඩ පැරෑළියේදී දුම්රියක් මුළු මණින්ම මුහුදුබත් විය. 1989න් පසු නැවත සමූහ මිනී වළවල් තැනුනේ සුනාමියටය.

දැන් වැදගත් වන්නේ පාඩම් ඉගෙන ගැනීමයි. අප නොදන්නා දේ ලෝකයේ තවත් සිදුවිය හැකිය. උදාහරණයක් ලෙස පිට සක්වළ ජීවීන් කණ්ඩායමක් අපට පහර දීමට හෝ ඉන්දියන් සාගරයට විශාල උල්කාපාතයක් කඩා වැටීමට හෝ එක පළාතකට පමණක් ඔක්සිජන් හිඟ වීමට හෝ දින හයක් හිරු එළිය නොලැබ යාමට හෝ ඉඩ කඩ නැතැයි කීමට අපි නොදන්නෝ වෙමු. එහෙත් කරුමය වී ඇත්තේ සුනාමියෙන් පසුව ඇති වූ උනන්දුව විසින් ලෝක බොරු පතුරුවන්නන්ට හොඳ අවකාශයක් නිර්මාණය වීමයි. දැන් “නාසා“ කී පමණින් දේව වචනයක් සේ විශ්වාස කරන්නට අපි සූදානම් ව සිටිමු. එහෙත් ඉස්සර දෙවියන් විකුණාගෙන කෑ එවුන් දැන් නාසා ආයතනය විකුණාගෙන කන්නට උත්සාහ කරති.

ඉහත කී වාර්තාව සකස් කර ඇත්තේ සුනාමියෙන් දින තුනකට පසුව අධ්‍යයනය කිරීම ආරම්භ කර තවත් දින හතරක ඇවෑමෙන්ය. එහි පස් වැනි පිටුවේ සඳහන් පහත කාරණයද අපේ අවධානයට යොමු විය යුතු බව සිතමි.

“සරණාගත කඳවුරු වල තත්වය“ යනුවෙන් වාර්තාවේ මෙවැනි අදහසක් දක්වා ඇත.

a.     අධ්‍යයන කණ්ඩායමේ අහඹු පරීක්ෂාවට ලක් වූ කඳවුරු එකකවත් ආණ්ඩුවේ මැදිහත් වීමක් දක්නට ලැබී නැත.

b.     ඉඳ හිට වූ කඳවුරක ග්‍රාම නිලධාරී තැන සිටිනු දක්නට ලැබී ඇත. සමහරවිට ග්‍රාමනිලධාරී හෝ ඔහුගේ කිට්ටුවන්තයකු සුනාමියට ගොදුරු වීම නිසා ඔහු එහි ගියා වීමටද ඉඩ ඇත. කෙසේ වුවද වාර්තාවේ දැක්වෙන්නේ ග්‍රාමනිලධාරීවරුන් සහන සැළසීමේ ක්‍රියා දාමය තුළ සිදු කළ කාර්ය භාරය නොසැළකිය හැකි තරම් කුඩා බවයි.

c.      කණ්ඩායමේ නිරීක්ෂණයට ලක් වූ සියළුම කඳවුරු ආගමික නායකයන් හෝ ස්වේච්ඡා ක්‍රියාකාරීන් විසින් පන්සල් පල්ලි හෝ පාසැල් තුළ පවත්වාගෙන යනු ලැබ ඇත.

d.     විපතට පත් වූවන් විසින් සරණාගත මධ්‍යස්ථාන ලෙස එම ස්ථාන වෙත ස්වේච්ඡාවෙන්ම රොක් වී ඇත්තේ ඒවා ආරක්ෂිත උස් ස්ථාන නිසා බව පෙනී ගොස් ඇත.

e.      සහනාධාර බෙදන වේලාවන්හිදී සරණාගතයින් සංඛ්‍යාව වැඩි වන ස්වභාවයක් දක්නට ලැබී ඇත. එයට හේතු ලෙස වාර්තාව සඳහන් කරන්නේ

                                                             i.      සරණාගතයන්ගේ ඉතිරි වී ඇති දේපළ කොල්ල කාගෙන යනු ඇතැයි බිය නිසා කැඩී බිඳී ගිය නිවෙස් වලට වී සිටින සරණාගතයන් ආධාර බෙදන අවස්ථාවලදී පමණක් කඳවුරු තුළට රොක් වන බව

                                                           ii.      සරණාගතයින් ලෙස පෙනී සිටින බොහෝ දෙනකු සත්‍ය වශයෙන්ම සුනාමියට ගොදුරු වූවන් නොවන මුත් අවස්ථාවෙන් පළ ලබාගැනීමට කඳවුරු ගත වන බව.

f.       සියළු කටයුතු කරගෙන යාමේදී හා සම්බන්ධීකරණයේදී දැඩි අපිළිවෙලක් දක්නට ලැබී ඇත.

කෙළෙහි ගුණ දන්නෙ නැති ජාතියක්

සුද්දා 1815දී ගිවිසුමක් ගසා ලංකාවේ පාලනය අතට ගත්තා.
ඊට පස්සෙ සුද්දා ලංකාව සංවර්ධනය කරගෙන කරගෙන කරගෙන ගියා.
පාරවල් හැදුවා, කෝච්චි පාරවල් හැදුවා. ඉස්පිරිතාල හැදුවා.
තේ ෆැක්ටරි වල, තව තව කොම්පැණි වල අපේ කොල්ලන්ට රස්සාවල් දුන්නා.
ජාතික සමගිය උපරිමේට රැක්කා.
1915 සිංහල - මුස්ලිම් කෝලාහලය ගාණට ෂේප් කළා.
පානදුරා වාදය හරහා ආගමික ගැටුමක් ඇති වෙන්න දුන්නෙ නෑ.

එච්චර කරපු සුද්දට අපේ රටේ මිනිස්සු යන්න කිව්වා.

අහිංසක මහින්දටත් කරන්නෙ ඒකමයි.

කෙළෙහි ගුණ නොදන්න ජාතියක්!!!

මෝඩයෝ සහ කපටියෝ

ලෝකය පුරාම මෝඩයෝ හා කපටියෝ සිටිති.
“ඕක කියන්නත් දෙයක්ද?“ නිසැකවම ඔබ අසනු ඇත.
පෙරේදා සිට දින හයක් යන තුරු ලෝකයට සූර්යාලෝකය පතිත වීම සියයට අසූවකින් හෝ අනූවකින් අඩු වන බව නාසා  ආයතනයේ ප්‍රධාන පරිපාලකයා වන චාල්ස් බෝල්ඩන් විසින් පවසනු ලැබ ඇතැයි සමහර පුවත්පත් වාර්තා කළෝය. නිකම්ම නොවේ, කට්ට අව්වේ වේලෙමින් මයික්‍ර ෆෝනයකින් ඔහුු කතා කරන ඡායාරූපයක්ද සමගය.

මේ පචබාහුලා කීවේ, අප සතුව ප්‍රමාණවත් ඉන්ධන ඇති නිසා එම දින කිහිපය තුළ ජනජීවිතය අඩාල වන කිසිවක් සිදු නොවනු ඇතැයි නාසා ආයතනය මගින් වැඩිදුරටත් කියා තිබෙන බවයි.

බොරුව සම්පූර්ණයෙන්ම ගලවාගන්නට මේ පචයේ නිර්මාතෘ අසමත් වූ බව තේරුම් ගත් අයටනම් මේ “නිව්ස්“ එක අතේ පැලවෙන ටොම් පචයක් බව තේරුම් යන්නට ඇත. දින හයක අඳුරු කාලසීමාවට ප්‍රමාණවත් තරම් ඉන්ධන ඇති බව කීමෙන් අදහස් කරන ලද්දේ හිරු එළිය නැති වීමෙන් පොළොවට අහිමි වන්නේ ආලෝකය පමණකැයි සිතාගැනීම නිසා විය යුතුය.

පසුගිය අවුරුදු 61 තුළ ලංකාවේ වාර්තාගත අඩුම උෂ්ණත්වය 2011 ජනවාරි 13වැනිදා පැවැතුණු බව (දැන් සති දෙකකට වඩා පැරණි සිද්ධියක් නමුත්) ඔබට මතක ඇතැයි සිතමු. එදින කොළඹ නගරය සෙන්ටිග්‍රේඩ් අංශක 18.8 දක්වාත්, නුවරඑළිය 7.9 දක්වාත්, මඩකළපුව 16.9 දක්වාත් උෂ්ණත්වය පහත වැටුණු බව වාර්තා කර තිබිනි. එහි ප්‍රතිපලයක් ලෙස සතුන් විශාල වශයෙන් මිය ගිය බවද වාර්තා විය. එසේ උෂ්ණත්වය පහත යාමට හේතු වූයේ අවට කලාපයට ඉහළ වායු ගෝලයේ රැඳී තිබුනු ඝන ජලවාෂ්ප (වළාකුළු) තට්ටුවක් නිසා බවත් දැනගන්නට ලැබිනි.

එම අත්දැකීම මත කල්පනා කරද්දී දින හයක් මුළු පෘථිවි ගෝලයටම ආලෝකය නොලැබී යාම නිසා නිසැකවම පොළොවේ ජීීවත් වීම ශීතකරණයක් තුළ සිටීම වැනි තත්වයට එන තුරු මහපොළොව සීතල වනු ඇත. කිසි ගැටළුවක් නැතැයි නාසා කීවාය යන කාරණය බොරුවක් වන්නේ එනිසාය. එම දෙවැනි ප්‍රකාශය බොරුවක් වූ පසුව පළමුවැනි ප්‍රකාශය ගැන විශ්වාසයක් තබාගැනීමට හැකියාවක් ඇත්තේම නැත.

එහෙත් මේ අඳුරු දින හයේ කතාව විශ්වාස කළ බොහෝ දෙනකු මෙරට ද සිටියහ. නාසා පටලවා ගැනීම මෙම විශ්වාසය ඇති කිරීමට හේතු වූ බව පැහැදිළිය.

පසුගිය දෙසැම්බරයට නියම වී තිබී කල් දමන ලද ලෝක විනාශය පිළිබඳ මායන් කැළැන්ඩරයේ කතාව ද තවත් එබඳු දක්ෂ නිර්මාණයකි. මේවා දක්ෂ නිර්මාණ ලෙස අප කියන්නේ බහුතර ජනතාවගේ පිළිගැනීමට ලක් වූ පුද්ගලයන් හෝ ආයතන හෝ මති මතාන්තර පටලවා එම කතන්දර සකස් කරන බැවිනි. අපේක්ෂා භංගව එම දින කීපය ගත කළ පුද්ගලයන් කිහිප දෙනකු සමග ඒ දිනවලදී මග තොටදී මුණගැසුණු විට කළ කතාබහේදී පැහැදිළි වූයේ ඔවුනගේ විඥ්ඥානය තුළට එම ප්‍රවෘත්තිය දැඩි ලෙස කිඳා බැස තිබුනු බවකි.

මෙලෙස අමු බොරු ගොතා මහජනතාව රැවටීමේ යෙදෙන්නන් හුදෙක් විනෝදය තකා ඒවා නිර්මාණය කරනවායැයි ඔබ සිතන්නේද?

සත්‍යය මුසු කරන ලද බොරුවකට වඩා හොඳ පිළිගැනීමක් ඇත. මෙම සිද්ධාන්තය මැනැවින් හදාරා ඉන් පල ප්‍රයෝජන ලබාගන්නා අයකු ගැන මේ අවස්ථාවේදී ඔබට සිහියට නොනැගෙන්නේද? මෙළෙස අසීමිත ලෙස රැවටීමට ලක් වීම අපගේ බරපතල අඩුපාඩුවක් බව ඔබට නොවැටහෙන්නේද?

‘කියන්නා කෙසේ කීවත් අසන්නා සිහිබුද්ධියෙන් යුතුව අසා සිටිය යුතුයැ‘යි අපේ පැරැන්නන් කියා ඇති බව ඔබ අමතක කර දමා ඇත්තේ ඇයි?

අන්තඃපුරය The harem tent 18+

මේ කතාව http://www.lotsofjokes.com/dirty_jokes_15.asp වෙතින් උපුටා අනුවර්තනය කර පළ කරන ලදී.
තරුණයෝ තිදෙනෙක් සවුදියේ චාරිකාවක නිරත වෙමින් සිටියදී අහම්බෙන් යැවුනේ ධනවත් සුල්තාන්වරයකුගේ අන්තඃපුරයට ය. එහි ලස්සන කාන්තාවෝ සියදෙනෙක් පමණ සිටියහ. තරුණයන් තිදෙනා ඒ සියළු දෙනාම සමග මිත්‍ර සේවනයේ යෙදෙමින් සිටියදී හදිසියේම සුල්තාන්වරයා පැමිණියේය.

“මේ කාන්තාවන්ගේ ස්වාමියා මමයි. මා හැර වෙන කිසිවකු ඔවුනගේ ඇඟට අතවත් නොතැබිය යුතුය. නුඹලා තිදෙනා විසින් අද කළ ක්‍රියාවට නුඹලා වන්දි ගෙවිය යුතුයි. නුඹලාගේ රැකියාවනට ගැලපෙන පරිදි දඬුවම් නියම කරමි“ සුල්තාන්වරයා කියාගෙන ගියේය.

අනතුරුව තරුණයන් තිදෙනාගෙන් පළමුවැන්නා දෙස බලා “නුඹ යෙදී සිටින රැකියාව කුමක්ද?“ යනුවෙන් සුල්තාන්වරයා විමසීය.
“මම සෙබළෙක්“ තරුණයාගේ පිළිතුර විය.

“සෙබළෙක්, ඒ කියන්නෙ තුවක්කුවක් අරගෙන වෙඩි තියන එකෙක්. මං උඹේ ප**ට වෙඩි තියනවා“ සුල්තාන්වරයා ගුගුළේය. අනතුරුව දෙවැන්නා දෙස බලා රැකියාව විමසීය.

“මං ගිනි භටයෙක්“ දෙවැන්නාගේ පිළිතුර විය.

“ඔහ්, ගිනි භටයෙක්. එහෙනම් මං තොගෙ ප**ට ගිනි තියනව“.

අවසානයේදී තුන්වැන්නා දෙසට හැරුණු සුල්තාන්වරයා “නුඹ ජීවත්වන්නේ කුමන වෘත්තියක යෙදෙමින්ද?“ කියා විමසීය.

තොල කට වේලී සිටි තුන්වැනි තරුණයා අපහසුවෙන් ගොත ගැසීය.

“මං රස්සාවට කළේ ලොලි පොප් වෙළෙඳාම“.

ලංකාවේ දැන් කොටි නැද්ද? Who are the tigers?

අවුරුදු තිහක් තිස්සේම, එනම්, උතුමාණන් වහන්සේගේ කාලයේ සිට මහරජාණන් වහන්සේගේ කාලය දක්වා අපි කුරිරු යුද්ධයක් නිසා ඍජුව හෝ වක්‍රව බැට කෑවෙමු. බොහෝ දෙනකුගේ අවසන් ඉරණම අතිශය ශෝචනීය විය. තමන්ගේ ජීවිතයේ වටිනාකම නොතේරෙන අතළොස්සක් දෙනා හැරෙන්නට සිහි බුද්ධිය ඇති වැඩි දෙනකු යුද්ධය පිළිකුල් කරන්නේ එබැවිනි. එම පිළිකුල කෙතරම්ද යත් අවුරුදු පහක් තිස්සේ එය වවාගෙන කෑමටත් තවත් අවුරුදු හතරකටවත් එයම මාකට් කිරීමට වරම් ලබාගැනීමටත් මහරජුන්ට හැකියාව ලැබී තිබේ. (මේ රටේ වර්තමානයේ සිටින එකම නායකයා මහරජු පමණක් බව සියළු දෙනා විසින් අකැමැත්තෙන් හෝ කැමැත්තෙන් පිළිගත යුතුය. මී ළඟ ජනාධිපතිවරණයේදී එය වෙනස් වන්නේ නැත.)‍

මේ අවාසනාවන්ත යුද්ධය ඇති වූයේ කවුරුන් අතරද?

යුද බිමට පිළිපන් දෙපාර්ශවයම අතට ගත්තේ සතකුගේ රූප රැගත් ධජ දෙකකි.

මේ සතුන් දෙදෙනා කවරහුද? ඔවුන් ජීවත් වන්නේ කොහේද?

මේ සත්ව කොට්ඨාශ දෙකම මේ භූමියේ ජීවත් වන්නවුන් නොවෙත්. එසේනම් ඔවුන් සිය යුද්ධය සඳහා යුද පිටිය ලෙස මේ පුංචි දිවයිනම තෝරාගත්තේ ඇයි?

මෙය තේරුම් ගැනීමට අප අසමත් වීමු, තත්වය තව තවත් අවාසන්වන්ත වූයේ ලිබරේෂන් ටයිගර්ස්ලා විමුක්ති කොටි ලෙස පරිවර්තනය කරනු ලැබීම නිසා නොවේද?

මේ වැරදි පරිවර්තනයට වගකිවයුත්තේ එක්තරා වන ජීවී අධ්‍යක්ෂවරයෙකුයැයි කියැවෙන ලිපියක් මෑතකදී පුවත් පතක පළ විය. එය අතිශය සිනහ උපදවන කරුණකි. වන ජීවී අධ්‍යක්ෂවරයා ටයිගර් යන්න කොටියා කියා වැරැදියට පරිවර්තනය කරද්දී නිහඬව එය පිළිගත් ජනතාව විෂය භාර අමාත්‍යවරයාම වල් අලියාට වන අලියා කියා නම්බු දී කතා කරද්දී එය පිළිගැනීමට මැළි වෙති. මෙය සිංහලයාගේම අවාසනාවද?

පහත ඇත්තේ කොටියා යනුවෙන් ටයිප් කර ගූගල් පින්තූර සෙවීමේදී ලැබුනු පින්තූර වේ. එක වචනයකට සත්ව වර්ග දෙකක රූප (වයිරන් තියන සතෙක් සහ පුල්ලි තියන සතෙක්) යෙදී ඇති සැටි බලන්න.

දැන් ඊ ළඟට දෙමළ භාෂාවෙන් එම සත්ව වර්ග දෙකේ නම් දෙවරකට යෙදූ විට ලැබෙන පින්තූර බලන්න.
මේ පුලි කියන දෙමළ වචනයට ලැබෙන පින්තූර:

මේ පින්තූර අරගෙන තියෙන්නෙ දෙමළෙන් චිරුත්තෛ කියන වචනයට:

මේ අභ්‍යාසය මා භාෂා ගණනාවකින්ම කර බැලුවා. මා විවිධ භාෂා විශාරදයකු නොවේ. මෙහිදී මට සහය වූයේ ගූගල් ට්‍රාන්ස්ලේට් පහසුකමයි.

ඔබත් අත් හදා බලන්න. ටයිගර් යන්න ඔබ කැමති භාෂාවකට පරිවර්තනය කරන්න. පින්තූර සර්ච් කරන්න.

දැන් ලෙපර්ඩ් යන්නත් එම භාෂාවට පරිවර්තනය කරන්න. පින්තූර සර්ච් කරන්න.

ඊට පස්සෙ ඕනැනම් කමෙන්ට් එකක් දමන්න.

හෝව් පොඩ්ඩක්, අමතක වුනා මේක කියන්න.

ටයිගර් = ව්‍යාග්‍රයා,

ලෙපර්ඩ් = කොටියා, දිවියා,

පැන්තර් = දිවියා, 

වයිල්ඩ් කැට් = දිවියා, වල් බාවා, වල් බළලා

(අජිත්ලා අරුණිලා හිතනව වගේ හැම ඉංග්‍රිසි වචනයකටම සිංහල වචනයකුත් හැම සිංහල වචනයකටම ඉංග්‍රිසි වචනයකුත් “එකට එක“ සම්බන්ධතාවකින් ඇත්තෙ නෑ. ලෙපර්ඩ් කියලා සමහර දිවියන්ටත් පැන්තර් කියලා වෙනත් සත්තුන්ටත් කියැවෙන තැන් තිබෙනවා. ඒත් ඔය පුල්ලි තියන කොටියට ටයිගර් කියල කිසිම සුද්දෙක් කියන්නෙ නෑ. වයිරන් තියන එකා තමයි ටයිගර්. අපි ඒකාට කියන්නෙ ව්‍යාග්‍රයා කියලා. කවි වලදි එහෙම “වග වළසුන්“ කියන්නෙත් ඔය ව්‍යාග්‍රයාම තමයි. ඒක සංසකෘත භාෂාවෙන් කියද්දි මං හිතන්නෙ මහප්‍රාණ වෙනව “ව්‍යාඝ්‍ර“ කියල. හැබැයි අර “ව්‍යාග්‍රා“ කියන බෙහෙත් ජාතියට ඒ නම ආවෙ කොහෙන්ද කියලනම් මං දන්නෙම නෑ ඔන්න.

ඒ වගේම තමන්ගෙ රටේ දකින්ට නොලැබෙන සත්තුන්ට ඒ රටේ භාෂාවෙන් නමක් හැදෙන්නෙ නෑ. පැන්ඩාවන්ට රයිනෝසිරස්ලට එහෙම සිංහල නම් නැත්තෙ ඒකයි. හැබැයි සිංහයාට කඟවේනාට සිංහල නම් තියෙන්නෙ එතකොට ඒ නම් හදපු සිංහලයො ජීවත් වෙලා තියෙන්නෙ මේ රටේ නෙවෙයිලුද?

ඒක වෙලා තියෙන්නෙ මෙහෙමයි
සිංහයා, කඟවේනා වගේ සත්තු විතරක් නෙවෙයි විෂ්ණු දෙවියො එහෙමත් අපට ආවෙ ඉන්දියානු සාහිත්‍යය හරහායි. ව්‍යාග්‍රයා ආවෙත් එහෙමයි.

....................

මේක එන්ලාජ් කරල (රයිට් ක්ලික් මෙනු එක) මෙයාගෙ ඇස් දෙක දිහා තත්පර දහයක් බලාගෙන ඉන්න.

සිංහලයන් සහ හෙළයන්

රාවණා සංකල්පය යළිත් ‘නැගල යන‘ බව පෙනී යයි. නාථ මහාචාරියතුමා පැහැදිළි කරන්නේ සිංහලයන් සහ හෙළයන් යනු දෙකොටසක් බවයි. එතුමාට අනුව හෙළයෝ පසුකාලයේදී කුමානුකූලව සිංහලයන් බවට පත් වී ඇත. එතුමාගේ ප්‍රවාදය මුල සිටම කියවන්නට හෙනහුරාට නොහැකි වූ නමුත් දැනට ප්‍රවෘත්ති පත්‍ර වල පළ වන එතුමන්ගේ සංකල්ප ධාරාවන්ට අනුව ඉන්දියාවෙන් මෙහි පැමිණි ජන කොටස් නිසා හෙළයින් සිංහලයන් බවට පත් වී ඇත.

බටහිර විද්‍යාව හා නාථ දෙවියන්ගේ කතාව කෙසේ වෙතත් වර්තමානයේදී ශ්‍රී ලංකාව නමින් හඳුන්වනු ලබන මේ දිවයිනට විජය නමැති කුමාරයකු ගොඩ බැස්සා යැයි මහාවංශයේ සඳහන් වන සිද්ධියට බොහෝ පෙර කාලයක සිට මෙහි මනුෂ්‍යයන් ජීවත් ව සිට ඇති බවට සාධක ඇති බව අපි දනිමු. කිතුල්ගල බෙලි කටු ලෙන මෙන්ම බලංගොඩ මානවයාගේ ඇටසැකිල්ලද ඒ බවට ජීවමාන සාක්ෂි සපයයි. එමතු නොව විජය කුමාරයාට කුවේණි නමැති ස්ත්‍රියක් මුණ ගැසී ඇති බව මහාවංශයේම සඳහන් වී ඇත.

නාථ මහාචාර්ය තුමා හෙළයින් වශයෙන් හඳුන්වන්නේ මේ කුවේණිය සහ ඇයට පෙර සිටියවුන් විය යුතුය. ඔවුන් කථා කරන්නට ඇත්තේ “හෙළ“ භාෂාව බව ඇතැම් අයගේ අදහසයි. කෙසේ වුවත්, ඔවුන්ගේ භාෂාව සහ විජය කුමාරයාගේ භාෂාව ඒ තරම් විශාල වෙනසක් ඇති භාෂාවන් නොවන්නට ඇතැයි ද සිතිය හැකිය. භාෂා පරිවර්තකයකුගේ සහාය ලබාගෙන විජය කුමාරයා කුවේණිය සමග අදහස් හුවමාරු කරගත් බවක් පෙනෙන්නට නැත.

විජය කුමාරයා ඉන්දියාවේ නැගෙනහිර පිහිටි බටහිර බෙංගාල ප්‍රාන්තය ප්‍රදේශයේ සිටි බව කියැවේ. මේ ප්‍රාන්තයේ දැනට කතා කරන්නේ බෙංගාලි භාෂාවයි. කල්කටා නගරය තිබෙන්නේ මේ ප්‍රාන්තයේය. කෙසේ වුවත් විජය කුමාරයාගේ පියා සිංහබාහු බවත් සීයා අමුවෙන්ම සිංහයකු බවත් කියැවේ. ඒ අතරම, විජය කුමාරයා ඇතුළු පිරිස සිංහ වංශයේ බවටද මතයක් පවතී.

ඒ කාලයේ මේ දිවයිනේ ජීවත් වූවන් සූර්ය වංශිකයන් බවත් කියනු ලැබේ. වර්තමාන ජාතික රාජ්‍ය සංකල්පය නොපැවැති ඒ කාලයේ රාජාණ්ඩු ක්‍රමය යටතේ ජාතිය සහ රට එකිනෙකින් ස්වායත්ත වූ ඒවා බව පිළිගැනීමට සිදු වේ. එක රටක් යනු රජෙකුගේ අණසක යටතේ පැවැති භූමි ප්‍ර දේශයක් වූ අතර ඒ “රට“ තුළ විවිධ මූලයන්ගෙන් පැවැතෙන මිනිසුන් ජීවත් වන්නට ඇත. පුරවැසියන් ලියාපදිංචි කිරීමක් හෝ වීසා ලබාදීමක් හෝ පාස්පෝට් නොමැතිව ගොඩබැසීමට බාධාවක් නොතිබුනු නිසා මිනිසුන් නිදහසේ සංක්‍රමණය වෙමින් ජීවත් වූ බව සිතිය හැකිය.

රාවණා රජු සූර්ය වංශිකයකු බව පිළිගැනේ. එසේ වූ නමුත් හෙතෙම “සිංහල“ ජාතිකයකු හෝ “හෙළයකු“ යැයි සඳහනක් සොයාගැනීමට නැත. මේ දිවයිනේ උපත ලබා ජීවත් වූවන්ගෙන් පමණක් අද ජීවත් වන ජන කොට්ඨාස පැවතෙන බව විශ්වාස කිරීම මානසික ව්‍යාධියක් මිස අන් කිසිවක් නොවේ. එයට හේතුව නම්, අතීතයේ විවිධ කාලයන්හිදී විවිධ ජන කොටස් මෙහි පදිංචියට පැමිණි බවට තොරතුරු ඇති තරම් හමු වීමයි. මෙහිදී තිරියායේ ගිරිහඩු සෑය ඉදිවීමට හේතු වූ තපස්සු - භල්ලුක දෙබෑයන්ට බුදුරදුන් හමු වීමේ කතාවද සිහියට නැගේ.

ජාතිය නිර්ණය කරනු ලබන්නේ කථා කරන භාෂාව හෝ ප්‍රවේණිය හෙවත් පරම්පරාව පමණක් නොව ජන කණ්ඩායමක සංස්කෘතිය ද සැළකිල්ලට ගැනීමෙනි. සත්වයකුගේ උත්පත්තිය එක් අයකුට පමණක් ඇති කළ හැකි දෙයක් නම්, නිර්මල වූ පරම්පරාවක් ගොඩ නගා ගැනීමේ හැකියාවක් යම් ජාතියකට තිබිය හැකිය. එහෙත් සෑම විටම සත්ව වර්ගයා ඊ ළඟ පරම්පරාව ඇති  කරන්නේ දෙදෙනකුගේ සහභාගිත්වයෙනි. එමතු නොව එම දෙදෙනා එකිනෙකා කෙරෙහි බෙහෙවින් ආකර්ෂණය වන සුළු ලක්ෂණ වලින් හෙබි බැවින් එකී සහභාගිත්වය ඇති වන අවස්ථාවේදී ජාතිය පිළිබඳ සංකල්පය බොහෝ විට අමතක වී යයි.

මිහි තලයේ ජනගහණය වැඩි වීමත් සමග දේපොල හිමිකම පිළිබඳ බිය වැඩි වීමෙන් පසු ඇතැමුන් “ජාතිය“ පළමු තැන්හි ලා සළකන්නට පෙළඹුනත් වෙනත් අය එයට තුට්ටුවක සැළකිල්ලක් දක්වන්නේ නැති බව පැහැදිළි කරුණකි. මෙහිදී ජාතියට වඩා භාෂාව බලවත් වනු ඇතැයි තර්කානුකූලව සිතේ. එකිනෙකා අතර අදහස් හුවමාරු කරගැනීමේ හැකියාව මැනැවින් ඇත්තේ නම්, ජාතිය පිළිබඳ හැඟීමක් ඇති නොවන තරම් වේ. ලංකාව සාගරයෙන් වට වූ රටක් නිසා මේ තරමින් වත් අමිශ්‍ර වූ ජාතියක් මෙහි දැකීමට හැකි නමුත් විශාල මහාද්වීප තුළ පිහිටි රටවල ජාතීන් අතර සම්මිශ්‍රණය සුලභ ය. එවැනි රටක ජාතිය යනු ලියාපදිංචි වී ඇති ජාතික රාජ්‍ය ය අනුව තීරණය වන්නකි. ඩෙන්මාර්ක් ජාතික පියාත් ස්වීඩන් මවත් සහිත මිනිසුන්ද රුසියානු පියාත් යුක්රේන මවත් සහිත මිනිසුන්ද යුරෝපය පුරා හමු වේ. මරාති හා ගුජරාති වැනි සමාන ලක්ෂණ සහිත ඉන්දියානු භාෂා භාවිතා කරන්නන් අතර ද එසේම සම්බන්ධකම් සුලභය. විදේශීය භාෂාවන් මැනැවින් හසුරුවන බොහෝ අය විවාහ ආවාහ කරගන්නේ තම ජාතියේම පුද්ගලයන් නොවේ. අදහස් හුවමාරු කරගැනීමේ හැකියාව විවාහයකදී වැදගත් කාර්ය භාරයක් ඉටු කරයි. භාෂාවක් නොමැතිව ඇස් දෙකෙන් කතා කරන ජෝඩු නැතැයි මෙයින් අදහස් නොකැරේ.

මේ නිසා, මේ රටේ ජීවත් වන සිංහලයන් රාවණා රජුගේ කාලයේ සිට මෙහි සිටින්නන්ගෙන් පැවැතෙන්නවුන්ය යන තේරුමක් නැති තර්කය තවදුරටත් ගෙන යාම අඥාන කමකි. කුමන ආකාරයෙන් ආරම්භය ඇති වුනත් අද මේ රටේ සිටින එක් ජන කණ්ඩායමක් වනුයේ සිංහලයන් ය. එම ජන කණ්ඩායම වැඩි කාලයක් තුළ මේ රටේ පදිංචි වී සිටියායැයි කියා කවුරුන් හෝ ඔප්පු කළත් එයින් අත් වන යහපතක් නැත. එයට හේතුව භෞමික අයිතිය යනු කෘතිමව ගොඩනගාගත් සංකල්පයක් පමණක් බැවිනි. එවැනි සංකල්පයක් කරමත තබාගැනීම විනාශයට මං පෑදීමක් පමණකි.

තවත් වැදගත් කරුණක් ගැන මෙහිදී සටහන් කළ යුතුය. රාවණා රජතුමා සිංහලයන්ගේ මුතුන් මිත්තකු නම් ඒ සම්බන්ධයෙන් සිංහලයන් අතිශයින්ම ලජ්ජා විය යුතුය. ඒ මන්ද යත්, රාවණා රජතුමා සතුව තිබුනු බව කියැවෙන අති මහත් හැකියාවන් සම්භාරය එතුමාගෙන් පසුව පවත්වාගැනීමට සිංහල ජාතිය අපොහොසත් වී ඇති හෙයිනි.

මි ළඟට කියවන්න. : “සිංහලයාට එක වචනයක් නැත“

පෙට්ටිය කැඩුනා කියා නියෝජ්‍ය සාමාන්‍යාධිකාරී වෙත පැමිණිල්ලක්

මේ සතියේ පෝස්ට් එක සින්ඩි වල අප්ඩේට් වුනේ නැතුවාවත්ද?

පෙට්ටිය කැඩුනා කියා නියෝජ්‍ය සාමාන්‍යාධිකාරී වෙත පැමිණිල්ලක්

මැතිවරණයක් පිළිබඳ අදහසක් තුන් හිතකවත් නැති වෙලාවක ගෘහස්ථ පාරිභෝගිකයාගේ ලයිට් බිල සීයට විසි පහකින් අඩු කරන ලදී. (ගෘහස්ථ පාරිභෝගිකයා යනු ඒකීය පුද්ගලයා වැනි දෙපා සත්වයෙකි.) හදිසි නියෝගයක් මත කැරුණු මේ මිල අඩුකිරීම සම්බන්ධයෙන් මණ්ඩලය බරපතළ අර්බුදයකට මුහුණ පාන්නට ඇත්තේ ඔවුනට ලැබෙන ආදායම හදිසියේම පහත වැටීමට ඉඩ ඇති නිසා නොව අතිශය සංකීර්ණ ගණිත සූත්‍ර හරහා සකස් කරනු ලබන විදුලි බිල හෙවත් ලයිට් බිලකින් සීයට විසිපහක් අඩු වන පරිදි ගාස්තු ක්‍රමයක් සකස් කිරීමේ අපහසුතාව නිසායැයි සිතමි.කෙසේ නමුත්, මණ්ඩලයේ නිලධාරීන් විසින් ඒ අභියෝගය ජයගෙන ඇති බව පෙනේ. හැම ගෘහස්ථ පාරිභෝගිකයාටම හරියටම සීයට විසි පහක් අඩු වන්නේ නැති වීමට ඉඩ ඇති නමුත් අවම වශයෙන් සීයට විසි හතර හමාරක් වත් අඩු වන පරිදි ඉතා ප්‍රශංසනීය ලෙස නව අය ක්‍රමය සකස් කර ඇතැයි කුහක නොවී බලන අයකුට පෙනී යනවා ඇත.

කෙසේ වුවද, නව අය ක්‍රමය සම්බන්ධයෙන් සමහර ගෘහස්ථ පාරිභෝගිකයන් තුළ මනා වැටහීමක් නොතිබුනු බැව් පෙනී ගිය නිසා හෝ ළඟකදී මැතිවරණයක් පැවැත්වීමට ඉඩ තිබීම හැර වෙනත් හේතුවක් නිසා, මණ්ඩලයේ නියෝජ්ය සාමාන්‍යාධිකාරවරයකු සමග පවත්වන සාකච්ඡාවක් සජීව ලෙස ප්‍රචාරය කිරීමට එක්තරා ගුවන් විදුලි සේවාවක් කටයුතු යොදා තිබිනි. බිල සකස් කරන ආකාරය පිළිබඳ නොයෙකුත් ප්‍රශ්න දුරකථන මගින් යොමු කර තිබුනු අතර ඒවාට සාර්ථක ලෙස පිළිතුරු ලබාදුන් උසස් නිලධාරීතැනට මණ්ඩලයේ කටයුතු සම්බන්ධයෙන් ප්‍රාමාණික දැනුම්වත් බවක් ඇතැයි පෙනී ගියේය.

මේ අතරවාරයේ එක් කාන්තාවක් නැගූ ප්‍රශ්නයක් වූයේ සිය ඉඩම මැදින් ඇද ඇති විදුලි රැහැන් නිසා නිවස ඉදිකිරීමේ අපහසුතාවක් ඇති වී තිබෙන බැවින් ඒ සඳහා කළ යුත්තේ කුමක්ද යන්නයි. එහිදී කටයුතු කළ යුතු ආකාරය පිළිබඳව ද පැහැදිළි කරන ලදී. තවත් අයකුට තිබුනු ප්‍රශ්නය නම් සිය නිවසේ (සමාවෙන්න, ගෘහ ඒකකයේ) සවි කර තිබුනු විදුලි මීටරය ආපදා වූ බව කියා මණ්ඩලයෙන් නව මීටරයක් සවි කළ පසු විදුලි බිල රුපියල් තුන්සිය ගණනක සිට අටසිය ගණනක් දක්වා වැඩි වීමය. ඔහුගේ ප්‍රශ්නය වූයේ විදුලි බිල වැඩි වීමට හේතුව අළුතින් සවි කරන ලද මීටරයදැයි යන්න ය. නිවසේ ජීවත් වන්නේ තමා සහ බිරිඳ පමණක් බැවින් එතරම් අධික විදුලි ඒකක ගණනක් පාරිභෝජනය වන්නේ නැති බවත් ඔහු වැඩි දුරටත් පැහැදිළි කළේය. (හෙනහුරා කුඩා කාලයේ ජීවත් වූ ගෘහ ඒකකයේ විශාල ගණනක් ජීවත් වූ නමුත් රූපවාහිනී යන්ත්‍රයක් නොතිබීම, ශීතකරණයක් නොතිබීම, පොල්කටු අඟුරු ඉස්තිරික්කයක් පාවිච්චි කිරීම, දර ලිප් භාවිතය ආදිය නිසා මාසයකට දවන ලදදේ විදුලි ඒකක විසි අටක් තිහක් වැනි ගණනක් වූ බව මෙහිදී හෙනහුරාට සිහි විය)

මෙම ප්‍රශ්න දෙකම යොමු කළ යුතුව තිබුනේ අදාළ ප්‍රාදේශීය කාර්යාලයන් වෙත බව එහිදී පැහැදිළි වූ කාරණයයි. ගුවන් විදුලියෙන් ප්‍රචාරය වන මෙවැනි පොදු වැඩසටහනකදී තමන්ගේ පෞද්ගලික ගැටළුවක් දුරකථනයෙන් විස්තර කරන අයෙකුට එම වැඩසටහනට සවන් දෙමින් සිටින තවත් ලක්ෂ කෝටි ගණනකගේ යහපත උදෙසා යමක් කළ හැකියැයි සිතා කටයුතු කිරීමට හැකිනම් ඉතා අගනේය. එහෙත්, ඔවුනට තමන් කතා කරන ආකාරය රටටම ඇසෙන බව මොහොතකට අමතක වී යන බව පෙනෙයි. කොකා ඉගිලෙන විට උගේ සුදු පාට පෙනෙන්නාක් මෙන් අප කතා කරන විට අපේ යම් යම් ගති සහ ගුණ ලෝකයට පෙනෙනවා නොවේද?

මෙම සාකච්ඡාව සවනට වැටෙමින් තිබෙන අතරතුරදී ගෘහස්ථ පාරිභෝගිකයන්ගේ මනස ක්‍රියාත්මක වන ආකාරය ගැන යම් හැඟීමක් ඇති කර ගැනීමට හෙනහුරාට හැකි විය. මේ අතරවාරයේ යොමුවුනු ඊ ළඟ දුරකථන ඇමතුමෙන් කියැවුනේ තම ගෘහ ඒකකයේ සවි කර තිබුනු මීටරය ආරක්ෂා වීමට යොදා තිබුනු පෙට්ටිය කැඩුණු පසු අළුතින් පෙට්ටියක් යෙදීමට මණ්ඩලය උනන්දුවත් නොදක්වන බවයි. කළින් යොදා තිබුනු පෙට්ටිය බාල ලීයෙන් සාදා තිබුනු බවත් ඔහු පැමිණිලි කළේය. පරිණත නිලධාරීයා සියළුම ප්‍රශ්න සඳහා පිළිතුරු ලබා දෙමින් අවම වශයෙන් ප්‍රශ්නය නැගූ අයගේ දුරකථන අංකය සහ ලිපිනය හෝ ඉල්ලා ගැනීමට තරම් කාරුණික විය.

හෙනහුරාට මේ සිද්ධිය ගැන ලියන්නට සිතුනේ එක්තරා විශේෂ හේතුවක් නිසා ය. එනම්, අපේ රටේ ආයතනගතව පවතින එක්තරා දුර්ගුණයක් මේ සාකච්ඡාව හරහා ඉස්මතු වීමයි. මහ රජතුමාගේ ඇමති මණ්ඩලයේ සිට පහළට යන විට සී සී මහත්තයාගේ කාර්ය මණ්ඩලය දක්වා ඇති සෑම ආයතනයකම ඇති මේ දුර්ගුණය නම්, වැඩක් කරවාගන්නට මහ එකාම අල්ලා ගන්නට සිදු වීමය.

මෙහිදී සඳහන් කළ යුතු තවත් වැදගත් කාරණයක් නම්, ඇතැම් ආයතනයන්හි ඉහත කී දුර්ගුණය නැති වුවත් හැම තැනම ඇති තත්වය ගැන පොදුවේ සිතන මහජනතාව එවැනි හොඳ ආයතනයකින් වුවත් වැඩක් කරගන්නට එහි ඉහළම නිලධාරියා හමු වීමට දැඟලීම නිසා ඇති වන අනවශ්‍ය හිරිහැරයට වගකිවයුතු වන්නේ ද ඉහත කී ආකාරයට මහ තැනින් අණ නොලැබුනොත් වැඩ නොකරන අලස කාර්ය මණ්ඩලයන්හි සාමාජිකයන්ම බවය.

මී ළඟට බලාපොරොත්තු වන්න: සිංහලයන් හා හෙළයන්

සල්ලි හම්බ කිරීමේ නිදහස

අඥාත කතුවරයන්ගේ හෙවත් අවිනිශ්චිත රචකයන්ගේ නිර්මාණ ඊ මේල් හරහා සයිබර් අවකාශය පුරා කැරකෙනවා. හෙනහුරා ඇතුළු සමහර බ්ලොග් කාරයෝ සහ බ්ලොග්කාරියෝ බොහෝ විට ඉංගිරිසි හෝ ඉන්දියානු ඉංගිරිසි වලින් ලියා ඇති මේවා කෙළින්ම හෝ පරිවර්තනය කිරීමෙන් පසුව හෝ අනුවර්තනය කිරීමෙන් පසුව හෝ ඒ ඇසුරු කරගෙන වෙනත් නිර්මාණයක් වශයෙන් හෝ සිංහල බ්ලොග් පාඨකයන්ට ඉදිරිපත් කරනවා.

එක දවසක් මේ බ්ලොග් එකේ තිබුනු එවැනි ලිපියකට කමෙන්ට් දාපු එක්කෙනෙක් කතාවේ මූලාශ්‍ර නොදැක්වීම ගැන දොස් කියලත් තිබුනා. ඒ කතාවට වගේ ම මේ කතාවටත් මූලාශ්‍ර පෙන්නන්න බැහැ. ඊ මේල් එකක් ප්‍රසිද්ධ කිරීමෙන් එය එවූ අයගේ සහ ලැබූ අයගේ පෞද්ගලික නිදහසට හානියක් වීමට ඉඩ තිබෙන නිසා ඊ මේල් එක උපුටාගෙන පෙන්වන්නත් බැහැ.

කොහොම වුනත් කතාව මේකයි.

වෙළෙන්දා ගොවියකුගෙන් බූරුවෙකු මිල දී ගත්තේ පවුම් සීයක මිලකට. වෙළෙන්දට මේ බූරුවා දක්කගෙන ගෙදර යන්න පුරුද්දක් තිබුනෙ නැතුවා විතරක් නෙවෙයි, ඒකට එයාට හීනියට ලැජ්ජාවකුත් තිබුන‍. කොහොමත් ඒ වෙලාවෙ තිබුනු වැඩ කන්දරාව එක්ක වැඩි වෙලාවක් මිඩංගු කරන්නත් බැරි නිසා "මං හෙට උදේම බූරුව ගෙදරට දක්කගෙන එන්නම් මුදලාලි" කියපු ගොවියගෙ අදහසට මුදලාලි එකඟ වුනා.

ඒත් පහුවෙනිද උදේම ගොවියා දැනුම් දුන්නේ බූරුවා හදිසියේම මරණයට පත් වුනු බවයි. වෙළෙන්ද ‍පවුම් සීය ආපහු ඉල්ලුවහම ගොවිය කිව්වෙ "අනේ මුදලාලි මට ඒක වියදම් වුනානෙ" කියලයි.

"හා කමක් නෑ මට මළකුණ ගෙනත් දීපන්"

"මළ කුණකින් මොකක්ද කරන්න පුළුවන් මුදලාලි?"

"මමනෙ කරන්නෙ. උඹ ගෙනත් දීපන්කො.

මං ඒකට දානව ලොතරැයියක්"

"ලොතරැයියක්? මළ කුණකට? ඒක විකාරයක්නෙ"

"මං කිව්වනෙ උඹට. ඒක මමනෙ කරන්නෙ. උඹ හැබැයි මේ බූරුවා මැරිච්ච බව කාටවත්ම කියන්න එපා".

---------------------------------------------------------------------------------------------------------

ඔන්න ඒ සිද්දියෙන් මාසෙකට විතර පස්සෙ අර ගොවියයි මුදලාලියි එකට මුණගැහුනා පොළට ගිය වෙලාවෙ.

"ආ මුදලාලි, අර මැරිච්ච බූරුවාට මොකද වුනේ?"

"මං ලොතරැයියක් දැම්මනෙ. ටිකට් පන්සීයක් වික්ක පවුම් දෙක ගානෙ. උඹට දීපු පවුම් සීයත් අඩු කරපුවහම මට පවුම් 898ක් ලාබයි."

"පුදුමයිනෙ, ඉතින් මුදලාලි කවුරුවත්ම වලියකට ආවෙ නැද්ද?"

"දිනුම ඇදිච්ච මෑන් ඇද්ද ලෙඩේ. මං පොරගෙ පවුම් දෙක ආපහු දීල දැම්ම".

දැන් මේ පුද්ගලයා පොදුරාජ්‍ය මණ්ඩල බැංකුවේ (Commonwealth Bank) මූල්‍ය උපදේශකයකු ලෙස සේවය කරන බව ඒ ඊ මේල් එකේ වැඩිදුරටත් සඳහන් කරල තිබුනා

ඒ වගේ, මොළය වෙහෙසවා සල්ලි හම්බකිරීමේ නිදහස රැකගන්න දිවි හිමියෙන් සටන් කරන්න ඕනෑ තේරුණාද?

(පින්තූරය ගත්තෙත් නෙට් එකෙන්මයි)

එක්සත් රාජධානිය සිරි ලංකාව ගැන සුද්දියන්ට කියන කතා

 ලංකාවේ සංචාරය කරන්න බලාපොරොත්තු වෙන සුද්දියන්ට ටිකක් පරිස්සම් වෙන්නැයි කියා 2013 සැප්තැම්බර් 1 වැනිදා එක්සත් රාජධානියේ විදේශ හා පොදුරාජ්‍ය මණ්ඩලීය කාර්යාලය විසින් විනාඩි 6 තත්පර 56ක වීඩියෝ ක්ලිප් එකක් යූ ටියුබ් එකේ දමා ඇත. මේ ගැන දැනගන්නට ලැබුනේ ඒ පිළිබඳව සඳහන් කළ බ්ලොග් පෝස්ට් එකක් විවේචනය කරමින් අරුණිශපීරෝ විසින් ලියනු ලැබූ පෝස්ට් එකක් දැකීමෙනි.

මෙහිදී, සුද්දා අතීතයේ ලංකාවට ඇවිත් කරපු කියපු දේ ගැන සඳහන් කිරීම අදාළ නැත. දැන් එංගලන්තයේ සුද්දන් කරන කියන දේ අදාළ වන්නේ ද නැත.

මෙය විශේෂයෙන්ම පසුගියදා තංගල්ල ප්‍රාදේශීය සභාවේ සභාපති ඇතුළු නඩයක් විසින් විසින් කරන ලද මිනී මැරුම හා ස්ත්‍රී දූෂණය අරභයා නිකුත් කරන ලද වීඩියෝවක් විය හැකිය. කෙසේ වුවද, ඒ වීඩියෝව ගැන යොදා ඇති කමෙන්ට්ස් මෙසේය.

වැඩිපුර විස්තර නොකියමි.

Daya Weerasinghe

7 months ago

 

Wellcome to The Banana Republick of Rajapaksa !

Sam Jay

7 months ago

 

My wife who is bit large not only stared at but continually and openly laughed at, she stared to cry. The famous hospitality that everyone talk about, I did not experienced in my last visit. Of cause people who knows you treat you extremely nice, but i had a feeling others like to quickly show you that they do not care about foreigners.

Shasi Tamil

7 months ago

 

all people I n the world must see and share. Have fun and stay safe. Thank you uk foreign office.

athirvu1

7 months ago

 

Thanks FCO. we will publish this in our webpage athirvu.com , This video is simply the best.... Kanna

Earth+

7 months ago in reply to Tamilan Germany

 

Really? Too bad, we've already visited their and we know they are wonderful people.

Tamilan Germany

7 months ago

 

Very Very Careful All of the Singala Bastard People is very Danger...

සතුටු ධනවාදී දිනයක්

පසුගිය වර්ෂයේ මැයි දිනය සමරමින් ධනවාදයේ දූතිකාව මෙසේ කීවාය.

“ලෝකයේ කම්කරුවන්ට මැයි දිනයක් සමරන්නට අවස්ථාව 1886 දී ඇමෙරිකාවේ චිකාගෝ නගරයෙන් උදා විය. දවසේ වැඩ මුරය පැය අටකට සීමා කරන්න යැයි ඉල්ලා කරන ලද වැඩ වර්ජනයක් ඊට ප්‍රධාන විය. එහෙත් කම්කරුවාගේ දිනය සමරන්නට පවා හැකි වී තිබෙන්නේ ධනවාදය ලොව බිහි වූ නිසා යැයි බහුතරයක් ශ්‍රමිකයන් නොදනිති.”

මංකොල්ලකරුවකු ඔබට නගරයේදී පිහියෙන් අනියි. වහාම ක්‍රියාත්මක වන අනෙකුත් මගීහු එකතු වී ඔබ ආසන්නතම රෝහලට ඇතුළත් කරති. නගරයේ පිහිටි රෝහල පහසුකම් සහිත රෝහලකි. ඔබ ගමේදී පිහි ඇනුමකට ලක් වූවානම් ඔබව ඇතුළත් කරනු ලබන්නේ අඩු පහසුකම් සහිත රෝහලකටය. නාගරික මංකොල්ලකාරයාට ඔබ ස්තුතිවන්ත විය යුත්තේ නාගරික රෝහලේ පහසුකම් භුක්ති විඳීමට ඔබට අවස්ථාවක් ලබාදීම නිසාය.

චිකාගෝ නගරයේදී පැය අටක වැඩ මුරයක් ඉල්ලූ කම්කරුවනට මැයි පළමුවැනිදා නිවාඩු දිනයක් සහිතව පැය අටේ වැඩ මුරය ලබා දුන්නේ නැත. වැඩවර්ජනය අවි බලයෙන් මඬින ලදී. කම්කරුවන් අත තිබුනු සුදු පැහැති කොඩි ලෙයින් නැහැවී රතු පාට විය. ජාත්‍යන්තර කම්කරු දිනය ලෙස ලෝකයේ කම්කරුවන් එම දිනය අනුස්මරණය කරන්නේ උපන්දිනයක් සමරන ලෙස නොවේ. එය හුදෙක්ම ධනේශ්වරය විසින් කම්කරුවා සූරා කෑමේදී ඇති වූ කම්කරුවාට ජයග්‍රහණයක් අත් කර දුන් ගැටුමක ප්‍රතිපලයක් සැමරීමකි. ජයග්‍රහණය ලබාගත්තේ ලෙයින් වන්දි ගෙවමිනි.

ඇය තවදුරටත් මෙසේ කියන්නීය. “වසර 250 කට පමණ ඉහතක දී මිනිසාගේ සමාජ තත්වය උප්පත්තියෙන් තීරණය වූවකි. දෑකැත්තක්, මිටියක් හදන පවුලක ඉපදුන අයෙක් ඒවා හදමින් මුළු ජීවිත කාලයම ගෙවා මිය ගියේය. ඔවුන්ගේ දෑකැති මිටි ගණුදෙනුවෙන් ලබාගත් අය වෙහෙසුනේ රදළයන් හා කුලීනයන්ගේ උවමනාවන් පිරිමසාලන්නට මුළු ජීවිත කාලය ගෙවමිනි.

තමනට අයිති භූමියක තමන් කැමති පරිද්දෙන් තමන්ගේ පවුලක් පෝෂණය කරමින් නිදහසේ ජීවත් වූ රන්මය යුගයක් ධනවාදයට පෙර ලෝකයේ කිසිම කලක කිසිම තැනක නොවීය. වැඩවසම් යුගයේ කර්මාන්ත ............”

ඇය මෙසේ අඳෝනා නගන්නේ වැඩවසම් යුගයට වඩා ධනවාදී යුගය මිනිසාට යහපත් බව කියන්නටය. එනිසා, ධනවාදය සදාකාලිකව පවත්වාගෙන යා යුතු බව කියන්නටය. ධනවාදී ක්‍රමය යටතේ සූරා කනු ලැබීම වැඩවසම් යුගයේදී තිබුනු සූරාකෑමට වඩා ප්‍රජාතන්ත්‍රවාදී බව කියන්නටය.

ධනවාදය අවසන් කර නැවත වැඩවසම් යුගයට යා යුතු බව ඉඳ හිට හමු වන ජාතික චින්තන කාරයන් වැනි ඔළුවෙ අමාරු කාරයෝ හැර වෙන කිසිවකු නොකියති. සත්‍යය වසන් කර අර්ධ සත්‍යය ගෙන හැර පාමින් මිනිසුන් රැවටීම, අමූලික බොරු කියා රැවටීමට වඩා සාර්ථක ය. අර්ධ සත්‍යය විශ්වාසනීය ස්වභාවයක් පෙන්නුම් කරයි. ගුවන් යානය පිටසක්වල ජීවීන් විසින් පැහැරගත් බව කීමේදීට වඩා මිනිසුන් පිළිගන්නේ එය ගුවන් මංකොල්ලයකට ලක් වූ බව කීමේදීය. අර්ධ සත්‍යය විසින් ජනතාව මංමුලා කරනු ලබයි. එය අසත්‍යයට වඩා භයානක වන්නේ එබැවිනි. අසත්‍යයක් විශ්වාස නොකරන නිසා මිනිස්සු තවදුරටත් සත්‍යය සොයති. එහෙත් අර්ධ සත්‍යයක් හමුවේ ඔවුහු සියළු ගවේෂණයන් අත් හැර දමති. රැවටිලිකරුවාට සුවසේ ජීවත් වීමට එය මහත් රුකුළකි.

සමාජයේ පරිවර්තනයන් අධ්‍යයනය කළ චින්තකයෝ ලෝකයේ සිටියහ. ජර්මනිය, එංගලන්තය වැනි රටවල සිටි ඔවුහු විවිධ ගවේෂණයන් ඔස්සේ මතවාද ඉදිරිපත් කළහ. මේ චින්තකයන් බටහිර පමණක් බිහි වූයේ පෙරදිග මිනිසුන්ට හිතන්නට මොළයක් නොතිබුනු නිසා නොවේ. පෙරදිග වැඩවසම් සමාජය ඒ වන විටත් ධනවාදයට පරිවර්තනය වී හෝ වෙමින් තිබුනේ නැත. අඩු වශයෙන් අතරමැද වූ රුසියාවේ ද සිදුව තිබුනේ අර්ධ පරිවර්තනයකි.

මෝර්ගන්, හේගල්, ලුඩ්විග් ෆොයබක් වැන්නවුන්ගේ කෘති අධ්‍යයනය කළ කාල් මාක්ස් හා ෆ්‍රෙඩ්රික් එංගල්ස් එම ඉගැන්වීම් ඔස්සේ තවදුරටත් චින්තනය මෙහෙයවීමේ ප්‍රතිපලයක් ලෙස පසුකලෙකදී මාක්ස්වාදය ලෙස හඳුනාගත් ඉගැන්වීමක්, මතවාදයක් පැතිරිනි. කාල් මාක්ස් හෝ එංගල්ස් විප්ලවවාදියෝ නොවූහ‍. ඔවුහු පීඩිත කම්කරුවන් ද නොවූහ. එහෙත්, වැඩවසම් ක්‍රමය පෙරළා දමමින් ප්‍රගතිශීලී පියවරක් ඉදිරියට තැබුවද යම් දිනයකදී ධනවාදී ක්‍රමයේ පැවැත්ම මානව සංහතියේ ප්‍රගමනයට හරස් වන බව තේරුම් ගත්හ. එම නිසා, ධනවාදී ක්‍රමය අවසන් කර “කොමියුනිස්ට්” නමැති ක්‍රමයකට ලෝකය ගමන් කළයුතු බව ඔවුනගේ අදහස විය. එම පරිවර්තනය ස්වභාවිකව, එනම් වැඩවසම් යුගය පෙරළා දමා ධනපති යුගය ආරම්භ වූ ආකාරයටම යම් දිනයක සිදු වනු ඇති නමුත් ඒ දිනය වන විට ඇති වීමට නියමිත විනාශය වළක්වාගැනීමටනම් සමාජ විප්ලවයක් අවශ්‍ය වන බව මාක්ස්වාදියා විශ්වාස කරයි. වෙනත් ලෙසකින් කියන්නේනම්, අනතුරුදායක දරු උපතක් හඳුනාගන්නා වෛද්‍යවරයා නියමිත දින ඉක්මවීමට පෙර සිසේරියන් සැත්කමක් මගින් දරුවා බිහිකරවා ගත යුතු බව විශ්වාස කරයි. ඒ දරුවාගේත් මවගේත් ජීවිත රැකගැනීමටය.

සැත්කම නොකළත් දරුවා උපදිනු ඇත. එහෙත්, මවගේ ජීවිතය අනතුරේය.

ඉතිරි ටික මැයි දිනයේදී කියවමු. ඔබට කැමැතිනම් ජර්මානු දර්ශනවාදය ගැන අන්තර්ජාලයෙන් හෝ පොත් පත් මගින් කියවන්න.