2013-03-17

හාවයි ඉබ්බයි 16+

හාවා දක්ෂය, වේගයෙන් දිවීමට පමණක් නොව ගණිතයට, නිර්මාණශීලිත්වයට, කර්මාන්ත වලට, කෘෂිකර්මාන්තයට හාවාට තිබුනේ සහජ හැකියාවකි. ඉබ්බා ඒ අතින් බලන කල සිටියේ හාවාට වඩා බොහෝ දුර්වල තත්වයකය. ඌට පිහිනීමේ හැකියාවක් ඇති නමුත් කර්මාන්තයන් සඳහා හෝ ගොවිතැන සඳහා ඉබ්බා අතිශයින්ම දුර්වල බවක් පෙන්නුම් කළේය. පිහිනීම හැරුණු කළ හාවාගේ දක්ෂතාවක් තිබුනේ නම් ඒ වෙළඳාමටය.


හාවාට කැලේ මැදදී දිනක් ඉබ්බා හමු වුනේ අහම්බෙනි. මේ හමුවීම තර්කයක් දක්වා දුරදිග ගියේ දෙදෙනාටම නොදැනී ය. අවසානයේදී දක්ෂයා තෝරාගැනීමට තරගයක් පවත්වන්නට හාවාත් ඉබ්බාත් එකඟ වූහ.

තරගය පැවැත්වුනේ කැලේදීමය. වල ගොඩැලි සහිත වූ අඩිපාරවල් විනා රනින් ට්‍රැක්ස් නොමැති කැලෑව තුල පැවැත්වුනු තරගයේදී හාවා පරාජයට පත් වූයේ කෙසේදැයි කියා අපි කුඩා කාලයේදීම අසා ඇත්තෙමු. තමාගේ හැකියාවන් ගැන අවබෝධයක් තිබුනු නමුත් නොහැකියාවන් ගැන හාවාට අවබෝධයක් තිබුනේම නැත. සියල්ලටමත් වඩා, තමා හැම විටම පළමුවැනි ස්ථානයේ වැජඹෙනු ඇතැයි හාවා සිතුවේය. එහෙත් කම්මැලිකමත් නිදාගැනීමත් හාවාගේ ජන්ම දායාදයන් බඳු විය. තරගය ආරම්භයට පෙර හාවා හීනියට අඩියක් ගැසුවේ පුරුද්දට මිස තහනම් උත්තේජකයක් වශයෙන් නොවේ. ප්‍රතිවාදියා මෙල්ල කිරීමට උත්තේජකයක් තබා ප්ලේන්ටියක්වත් අවශ්‍ය නැති බව සක්සුදක් සේ පැහැදිළිව තිබුනු කාරණයකි.

තරගයේදී හාවා ගව් ගණනක් ඉදිරියෙනි. ඉබ්බා පෙනෙන මානයක නොසිටියේය. තමන්ගේ දක්ෂතාව වූ දිවීම නිසි ඉරියව්වෙන්ම ආරම්භ කළ හාවා තමාට දැන් තරගයක් නැතැයි සිතුවේය. පොඩි පහේ ඇලට් එකක් දැමීමට සිතුනු අනිත් හේතුව නම් ලාවට දමාගත් ෂොට් එකේ පවර් ‍එක ඇක්ටිවේට් වීම නිසා විය හැකිය. අවසානයේ තම හැකියාව අකුළාගත් හාවා ගොරවමින් නිදන්නට විය.

ඉබ්බාට ඇල්කොහොල්  හරාම් ය. අධික මහන්සියක් නොදැරුවත් උගේ ගමන ඌ හැල්මේ ගියේය. වටපිට එවුන් මොනවා කරනවාදැයි බලන්නට හෝ සිතන්නට ඉබ්බාට වුවමනාවක් ඇති වූයේම නැත. අවංකවම කියනවානම් හාවා නිදා සිටින බව ඉබ්බාට නොපෙනුනේය. අවසානයේ දිනුම් කණුව පසු වූ බව පමණක් ඉබ්බාට අවබෝධ වෙමින් තිබියදී හාවා විදුලි වේගයෙන් පැමිණියේය. එහෙත්, කරන්නට දෙයක් නැත. එකඟ වූ පූර්ව කොන්දේසි අනුව දිනුම් කණුව පළමුවෙන් පසු කරන තැනැත්තා ජයග්‍රාහකයා විය. දුවන වේගය තරග කොන්දේසි වලට ඇතුළත් කරගෙන තිබුනේ නැත.

හාවා ලේසියෙන් පරාජය පිළිගන්නට කැමැති නොවීය. "එහෙම බෑ, අපි තව වටයක් තියන්න ඕනෑ". හාවාගේ තර්කය එසේ විනි.

"හා කමක් නෑ, හැබැයි ආපහු හිටපු තැනට යන්න බෑ, මෙතනින් ඉස්සරහට දුවමු." ඉබ්බාගේ යෝජනාවද වරදක් නැත. මෙපමණ දුරක් පැමිණ නැවතත් ආපසු යාම දෙදෙනාටම පාඩු ගෙන දෙන වැඩකි.

තරගය ආරම්භ විය.

මේ වතාවේ හාවාට ෂොට් එකක් දා ගැනීමෙන් වැළකුනේ පසුගිය වතාවේ අමිහිරි මතකයටත් වඩා වෙනත් හේතුවක් නිසාය. එය නම්, මේ දෙවැනි වටය ආරම්භ කරන ස්ථානයේ තැබෑරුමක් නොතිබීමය. හැරත්, මේ වට‍යේදීත් නින්දක් දාන්නට තරම් හාවා මෝඩයෙකු නොවේ.

තරගය අවසන් වීමට වැඩි වේලාවක් ගියේ නැත. හාවා ජයග්‍රහණය කළ බව අමුතුවෙන් කියන්නට වුවමනාද?

තරගයෙන් දිනූ බව සැබෑවකි. එහෙත්, පෙනෙන නොපෙනෙන මානයේ සිටියේ වැද්දෙකි. හාවා සහ ඉබ්බා යන දෙදෙනාගෙන් එකකු පමණක් එළාගන්නට තරම් වැද්දා ත්‍යාගශීලී නොවනු ඇත. දවල් කෑමට ඉබි මස් හොඳය. රාත්‍රියට බර ආහාර නුසුදුසු බැවින් හාවා රෝස් කරගෙන රා අඩියක් සමග භුක්ති විඳීමට හැකිය.

දැන් ඉතින් තරගය සඳහා නොව පණ බේරාගැනීම සඳහා දිවිය යුතුව ති‍බේ.

ප්‍රතිවාදියා වුවත් වැද්දාට අහුවෙන්නට ඉඩ දීමට හාවාගේ සිත ඉඩ දුන්නේ නැත. හාවා කළේ ඉබ්බා කර මත නංවාගෙන පවනට බඳු වේගයෙන් දිවීමයි. දැන් වැද්දා පසුපස හඹා එයි. ඒ අතරම අතට අහුවෙන දෙයින් දමා ගසයි. විටෙක විදුලියෙන්ද, තවත් විටෙක තෙල් වලින්ද වදින පහර කාගෙනම හාවා දුවන්නේ ඉබ්බා ද කර මත තබාගෙන ය. එහෙත් නොබෝ වේලාවකින්ම හාවාගේ වේගය අඩු වී බින්දුවටම බැස්සේය. ඒ මහන්සිය නිසා නොවේ. එතැනින් ඉදිරියට ඇත්තේ ගංගාවයි. හාවා පීනන්නට දන්නේම නැත.

සිත සිතා ඉන්නට වේලාවක් නැත. ඉබ්බා හාවාගේ කරෙන් බිමට බැස්සේය. හාවාට තම පිට මතට නගින්නැයි කී ඉබ්බා එසැණින් දිය මතට පැන්නේ ඊයක වේගය පරදවමිනි. දැන් ඉබ්බාත් හාවාත් ගංගාව මැද්දේ ය. වැද්දා ගං ඉවුරේ හි‍ටගෙන හති හළයි. මිතුරන් දෙදෙනා ග‍ඟෙන් එගොඩ වූයේ හදවත සැහැල්ලු කර ගනිමිනි.

හාවා ඉබ්බා දෙස කෘතඥතා පූර්වක බැල්මක් හෙළමින් ඉබ්බාගේ පිටෙන් බිමට බැස්සේය.

"මට‍ ගොඩබිමදී වේගයෙන් දුවන්න පුළුවන් වුනත් වතුරෙදි මං පරාදයි" හාවා නිහතමානී විය. "අපි දෙන්නා තනියෙන් බේරෙන්න හැදුවනම් දෙන්නටම අද වැද්දගෙ ‍කරෙන් තමයි යන්න වෙන්නෙ." ඉබ්බා ඉතිරි ටික සම්පූර්ණ කළේය.

(කතාව 16+ කියල දැම්මෙ හිට්ස් ගන්න එහෙම නෙවෙයි ඕං. මේකෙන් ලොකු අය පාඩමක් ඉගෙන ගන්නවනම් හොඳයි.)

19 comments:

  1. මාර කතන්දරයක්නේ.. උදේ පාන්දර කන බොක්කටම වැදුනා.. අපිත් හැමදාම කියන්නේ ඕක තමයි. ඒත් මේ වගේ ලස්සනට කියාගන්න බෑනේ..

    ReplyDelete
  2. අගෙයි අගෙයි...සහජීවනය...හොද පාඩමක්

    ReplyDelete
  3. පොඩි උන් පෙලන්න මහා උන්ට පුළුවන් වෙන්නේ එකමුතු කම නැති නිසා තමයි..
    නිර්මණය එල..!

    ReplyDelete
  4. හරවත් කතාවක්! කියන්න හදන දේ තේරුම් ගත්තා :)

    ReplyDelete
  5. මග පෙන්වුවට මාතලන් ට ස්තුතිය.මේවා තමයි ඉටිකිරිස් නිර්මාණ.හැංගිලා නැතිව ඔය වගේ එලියට දාන්න ඕන තරම් කතන්දර තියෙනවා.නව නිර්මාණ සිතට පහල වේවායි මගෙන් පැතුම්...!!!

    ReplyDelete
  6. කතාව නියමයි. ව්‍යංගාර්ථයෙන් උනත් කියලා තියන දේ තේරනවා.

    ReplyDelete
  7. //"මට‍ ගොඩබිමදී වේගයෙන් දුවන්න පුළුවන් වුනත් වතුරෙදි මං පරාදයි" හාවා නිහතමානී විය. "අපි දෙන්නා තනියෙන් බේරෙන්න හැදුවනම් දෙන්නටම අද වැද්දගෙ ‍කරෙන් තමයි යන්න වෙන්නෙ." ඉබ්බා ඉතිරි ටික සම්පූර්ණ කළේය.//

    මොකක් හරි ඒක දේකට දක්ෂ උනාම තමන් හැම දේම දන්නවා කියලා ඔලුව උදුම්මගන්න හැමෝටම මේ හාවා හොද පාඩමක්.

    ReplyDelete
  8. මේ යන විදියට නං දෙන්නටම වැද්දගෙ කර පිටින් යන්න වෙයි.

    ReplyDelete
  9. තෙල් වලිනුයි විදුලියෙනුයි ගහන්නෙ කවුද කියලනම් තේරුනා.නමුත් හාවා කව්ද ඉබ්බා කව්ද කියලා හරියටම මීටර් උනෙ නැහැ.පොඩි උදව්වක් කරන්න බැරැිද?

    ReplyDelete
    Replies
    1. කමෙන්ට් කළ සියල්ලන්ට ස්තුති කරන ගමන් කීර්තිට විතරක් නොතේරුනු දේ ගැන මෙහෙම කියන්නම්.
      හාවයි ඉබ්බයි දෙන්නම අපේ පුරවැසියෝ.

      Delete
    2. ස්තුතියි! ස්තුතියි!! උත්සාහය අති සාර්ථකයි.

      Delete
  10. නව අර්ථකතනයක්!
    කිඹුලා ගැන සඳහනක් නැත්තේ ඇයි?

    ReplyDelete
    Replies
    1. කිඹුලා ගැන කවුරුන් හෝ කමෙන්ට් එකකින් කියයි නේද?

      Delete
  11. නියමයි නියමෙට තියෙනවා, නපුත් ප්‍රශ්නෙට තියෙන්නේ මේ හාවයි ඉබ්බයි දෙන්න කවදාවත් මෙහෙම සමගි වෙයිද කියන එකයි.

    ReplyDelete
  12. EDA KIMBULATA ENTA BERI WELA, MOKADA, KIMBULATA CHOO, JEE, PADA, ADIYA YANTA WELA. JOKATH IRILA.

    ReplyDelete
  13. අහල තිබ්බා, හැබැයි මේ විදියට නෙමේ.. වටින කතාවක්!

    ReplyDelete

ඔබේ අදහස කියන්න.
මේ ලිපිය මෙතැනින් උපුටාගත් බව දක්වමින් ඕනෑම තැනක පළ කිරීම ගැන ලියුම්කරුගේ අමනාපයක් නැත.
මේ ලියමන ගැන දක්වන අදහස් පිළිබඳ වගකීමට ලියුම්කරු බැඳී නැත.
තෙවැනි පාර්ශවයකට අපහාස වන අන්දමේ නිර්නාමික අදහස් දැක්වීම්වලත් යම් අර්ථයක් ඉස්මතු නොකරන වචන පේළි වලත් කිසිදු ප්‍රයෝජනයක් නැති නිසා ඇතැම් විට ඒවා ඉවත් කරනු ඇත.
ඔබේ අදහස් දැක්වීම් ගැන සතුටු වෙමි. ධනාත්මක විවේචන වලට බෙහෙවින් ස්තුතිවන්ත වෙමි.