බ්ලොග්සඟරාව

BLOGSANGARAWA is written in Sinhala Unicode.

Even you do not have installed SINHALA UNICODE in your computer, you can read this page if you know Sinhala alphabet.

සංස්කරණය: හෙනහුරා නොහොත් මොබයිල්මෑන්
ප්‍රකාශනය: සුදත් මොහාන් බියන්වෙල. sudathmobile@gmail.com

2012-02-27

රාවණා යුගය ගැන ‍ඓතිහාසික හෝ පුරාවිද්‍යාත්මක සාධක

ලෝකයේ දැනට පවතින සංවිධානාත්මක ආගම් වලින් පැරණිම ආගම හැටියට සැළකෙන්නෙ හින්දු ආගමයි. හින්දු ආගමට කතෘ වරයකු නැහැ. අනාදිමත් කාලයක් තිස්සේ ඇති වූ විශ්වාසයන් සහ ඒවා මත සැකසුණු සම්ප්‍රදායයන් තමා හින්දු ආගමේ පදනම වෙලා තියෙන්නෙ. ලෝකයේ ඇති වූ මානව ශිෂ්චාචාරයන් අතර අධ්‍යාත්මික නැඹුරුව වැඩියෙන්ම පිහිටියේ පුරාතන ඉන්දියාවෙයි. සිද්ධාර්ථ කුමාරොත්පත්තිය දඹදිව සිද්ධවෙන්නෙත් ඒ නිසාමනෙ. ඒ කාලය වන විට දඹදිව් තලයේ කිං සච්ච ගවේෂී වූ පුද්ගලයන් සහ කණ්ඩායම් රාශියක් ඉඳල තියෙනව. ෂඩ් ශාස්තෲවරු වශයෙන් කියැවෙන පූරණකස්සප, මක්ඛලීගොසාල, නිගණ්ඨනාථපුත්ත, සඤජයබෙල්ලට්ඨපුත්ත, පකුධකච්චායන, අජිත කෙසකම්බල යනාදීන් අතරින් ආගමික සංස්ථාවක් ඇති කරල තිබෙන්නේ අවිහිංසාව පදනම් කරගත් ජෛනාගම දේශනා කරපු නිගණ්ඨනාථපුත්ත පමණයි.
රාවණා රජතුමා ගැන අපට දැනගන්නට ලැබෙන්නෙ වාල්මිකී නමැත්තකු විසින් ලියන ලදැයි සැළකෙන රාමායණය නමැති සංස්කෘත වීර කාව්‍යයක් නිසායි. එයට අමතරව මහායාන බුද්ධාගමේ සඳහන් වන ලංකාවතර සූත්‍රය ගැන පාඨකයෙක් කමෙන්ට් කරල තිබුන පසුගිය ලිපියට.
රාමායණය කියන්නෙ අද්භූත සිදුවීම් වලින් ගහණ වූ ප්‍රබන්ධයක්. ඒකෙ එන චරිතයන් සමහරවිට ඉතිහාසගතව හෝ මුඛ පරම්පරාගතව පැමිණි ඒවා වන්නට පුළුවන්. රාමායණය ලියැවෙන්නෙ බුදුහිමියන් වැඩ සිටි කාලයට ආසන්න කාල වකවානුවක බවයි ඉතිහාසඥයන්ගේ පිළිගැනීම.විශ්වාසදායකත්වය අතින් එතරම් ඉහළ තලයක නොතිබුනත් කරුණු කාරණා බොහොමයක් අඩංගු කරල තියෙන විකිපීඩියා විශ්වකෝෂයේ රාවණා ගැන සඳහන් වෙන්නෙ තනිකරම හින්දු ආගමික දෘෂ්ටියකින්.එපමණක් නෙවෙයි, රාවණ සංහිතාව නමැති ජ්‍යෝතිෂ්‍යය සම්බන්ධ පොත රාවණ රජතුමාගේ නිර්මාණයක් බවත් එහි සඳහන් වෙනවා. ඒ ලිපියෙ හැටියට රාවණා ලංකාද්වීපයේ රජකම් කරල තියෙන්නෙ ක්‍රිස්තු පූර්ව 2554 සිට 2517 දක්වා වූ කාලය තුළයි. එනම්, ගෞතම බුදුහාමුදුරුවන්ගෙ කාලයට අවුරුදු 2,000කට පමණ පෙර කාලයකයි.
රාවණා යුගය ගැන ‍ඓතිහාසික හෝ පුරාවිද්‍යාත්මක සාධක හමුවෙන්නෙ නෑ, එකිනෙකට පරස්පර තොරතුරු සහිත ග්‍රන්ථයන් හැරුණාම ඒත් රාවණා චරිතය මේ කලාප‍යේ රටවල් ගණනාවක සුළු වෙනස්කම් සහිතව දැකගන්නට පුළුවනි. රාමායණයේ සඳහන් කරුණු හැර රාවණා රජතුමා ගැන තිබෙන වෙනත් සාධක මොනවද කියල හොයල බලන්නෙ නැතුව අපක්ෂාපාතී නිගමනයකට එන්නට අපට හැකියාවක් නැහැ.
රාවණ රජතුමාගේ දෙමව්පියන් කවුරුද? දරුවන් කවුද? පරම්පරාවට සිදු වුනේ කුමක්ද?
රාවණා රජතුමා භාවිත කළ භාෂාව කුමක්ද? රාවණ සංහිතාව ලිව්වානම් ඒ කාල‍යේ ලේඛණ කලාව තිබුනාද? ඒවා ලියූ අකුරු ‍මොනවාද?
රාවණ රජතුමා ලංකාද්වීපයේ යම් ඉදිකිරීමක් කර තිබෙනවාද, එහි නටබුන් තිබෙනවාද?
රාවණා රජතුමා ගැන අපේ බෞද්ධ සාහිත්‍යයේ සඳහන් වෙන්නේ නැහැ කොතනකවත්. බුදුරජාණන් වහන්සේ ලංකාවට තෙවරක් වැඩම කරන්නේ මෙරට වාසය කරල තියෙන යක්ෂ ගෝත්‍රික සහ නාග ගොත්‍රික පාලකයන්ගේ හෝ ජනතාවගේ ප්‍රශ්න අරබයා බවයි සාහිත්‍යයේ කියැවෙන්නෙ. ඒත් රාවණාගේ පරම්පරාවක් ගැනවත් කියවිලා නැහැ. එහෙම වෙන්නෙ ඇයි?
තිරිසන් සතකුගෙන් අපේ ජාතිය පැවතෙනවාය කියන එක පිළිගන්න බැහැනෙ කොහොමටත්. පහුගිය ලිපියට එක කමෙන්ට් එකක් එවල තිබුන, සිංහබාහුගේ පියා සිංහයෙක් නොවෙයි සිංහ වංශයේ මනුස්සයෙක් බව කියල. ඒ කතාව කෙසේ වුවත්, විජය කුමාරයා කියන්නෙ පිටුවාහල් කරන ලද මනුස්සයෙක්. ඒකත් නෑ කියල අපට කතාවක් හදාගන්න බැරි කමකුත් නෑ. ඒත් ඉන්දියාව ගෑවෙන්නෙම නෑ රාවණා සිංහලයෙක් කියල ඔප්පු කරගන්න පුළුවන්නම්.
ඒකට තියන බාධාව තමයි සාක්ෂි නැති වීම. ලෝකෙ මිනිස්සු ව්‍යාප්ත වෙලා තියෙන්නේ මූලයන් තුනකින් කියල මතයක් තියෙනවනෙ. ඒ මූලයන් තුන ඇති වුනෙත් එක මූලයකින් වෙන්නට පුළුවන්.
මේ කතන්දර සියල්ල අනුව පැහැදිළි වෙන්නෙ කලින් ලිපියේදී සඳහන් කළ විදිහට ගංගාවක මුල සොයනවා වගේ ඈතට දිවයන අතීතයක් සහිත ජාතියක ආරම්භය සොයන්නත් බෑ කියන කාරණයයි. ඇමරිකාවෙ හරි ඕස්ට්‍රෙලියාවෙ හරි තත්වය මෙයට හාත්පසින්ම වෙනස්. ලංකාව වගේ අතිශයින්ම සම්පත් වලින් පිරුණු (ඒ කාලෙ හැටියට වැදගත් සම්පත්) භූමි තලයකට අහම්බෙන් හරි කඩා පාත් වුනු එකෙක් ලේසියෙන් ආපසු යන්නෙ නැති නිසා, මේ රටේ ජනතාව වරින් වර පැමිණුනු කණ්ඩායම් සහ පුද්ගලයන් ගණනාවකගෙන් පැවතගෙන එන බවයි මට හිතෙන්නෙ.
(මතු සම්බන්ධයි)

2012-02-24

රාවණ රජතුමා බෞද්ධයෙකු බව ඔබ දන්නෙහිද?

මේ ලිපිය ලියන්න මුල් වුනේ එක්තරා ඊ මේල් එකක්. මේ ඊ මේල් එක ලියපු මහත්මයා විතරක් නෙවෙයි තවත් ඇතැම් අයට බරපතල ගැටළුවක් තියෙනවා මේ සිංහල ජාතිය ආරම්භ වුනේ කොහොමද කියන එක ගැන. සාමාන්‍යයෙන් අපි අහල තියෙන එක කතාවක් තමයි, මහාචාර්ය එදිරිවීර සරච්චන්දුයන් අතින් සිංහබාහු නාටකය බවට පෙරළිලා තියෙන කතාව. මේ නාටකය බලල නැති අයනං නැතුව ඇති කියල මං හිතන්නෙ. කොහොම වුනත් ඒ නාටකයේ සිංහල ජාතිය සමග සිංහබාහුගෙ සම්බන්ධකමක් ගැන කතා කරන්නෙම නෑ. ඒ නාටකය ඊට වඩා බොහොම ඈතට ගිය සම්භාව්‍ය නාටකයක්. විශේෂයෙන් පරම්පරා ගැටුම සම්බන්ධයෙනුත්, පියකුගේ, මවකගේ, පුතකුගේ හා දියණියකගේ හිත් වලට එක් එක් අදහස් නැගෙන ආකාරය ගැනත් කියැවෙන, හැම අතකින්ම පිරිපුන් නාටකයක්. මං නම් හරිම ආසයි නැවත නැවතත් බලන්න.
සිංහබාහු කතන්දරේ මෙහෙමයි. නැගෙනහිර ඉන්දියාවේ හිටපු සුප්පා දේවී කියන රාජ කුමාරි සිංහයෙක් සමග වාසය කරනවා කැලේ ගල් ගුහාවක. මේ ජෝඩුවට ලැබෙනවා පුතෙක් සහ දුවක්. මේ පුතාගෙ පුතා තමයි විජය කුමාරයා. විජය කුමාරයා රටින් පිටුවහල් කරනවා සිංහබාහු විසින්. පිටුවාහල් කරපු විජය කුමාරයා නොදැනුවත්වම එන්නෙ ලංකාවට. ඇවිත් ලංකාවෙ හිටපු කුවේණි කියන යක්ෂණිය සමග ජීවත් වෙන්න පටන් ගන්නවා. පස්සෙ පොරට කුවේණි එපා වෙලා මදුරාපුරයෙන් බිසවක් ගෙන්වා ගන්නවා. මේ විජය කුමාරයා සහ පිරිස නිසා සිංහල ජාතිය ආරම්භ වුනා කියල මතයක් තියෙනව සමහර අය ගාව.
මෙතනදි එක කාරණාවක් තමයි සිංහයෙක් සහ මනුස්ස දුවක් අතර ඇතිවන සම්බන්ධ‍යකින් දරුවන් ඇති වෙන්න බැහැයි කියන ජීව විද්‍යාත්මක කාරණය. අශ්වයා සහ බූරුවා අතර සම්බන්ධයකින් කොටළුවා ඇති වුනාට අනික් සත්තුන්ගේ ඒ වාගෙ සිද්දවෙන්නෙ නැහැ කියලයි දැනට හොයාගෙන තියෙන්නෙ. මේක ජීව විද්‍යාත්මකව පැහැදිළි කිරීමට මට දැනුමක් නැති වුනත් සිංහයා + සුප්පාදේවී කියන කාරණාවනම් අසත්‍යයක් බව පැහැදිළියි.
ඒ කෙසේ වුවත්, විජය කුමාරයා කියන කෙනා මොන විදිහකින් හරි ඉපදුනානම් රාජ කුමාරයෙක් හැටියට, පොර පිටුවහල් කළානම් රුවල් නැවේ පාවෙලා ඇවිත් ලංකාවට කඩා පාත් වෙන්න ඉඩ තියෙනව. ඒ ටික ඇත්ත වෙන්න පුළුවන්. ඒත් මුළු ජාතියම ඒ කණ්ඩායමෙන් ඇති වුනා කියල කියන්න බෑ වගේම එහෙම නෑ කියල කියන්නත් බෑ. කොහොම වුනත්, ලංකාවට විජය කුමාරයා ගොඩබැස්සයි කියන්නෙ බුදුහාමුදුරුවෝ පිරිනිවන් පෑ දවසෙමයි.
විජය කුමාරයා ගොඩබැස්සයි කියන තම්මැන්නා වෙරළ පැත්තෙ මොන තත්වයක් වුනත් ලංකාවෙ ශිෂ්ටාචාරයක් තිබිල තියෙනව ඒ වෙනකොටත්. ඒකට සාක්ෂියක් තමයි තපස්සු හා භල්ලුක කියන වෙළඳ දෙබෑයො. මේ දෙන්නා බුදුහාමුදුරුවන්ගෙන් බණ අහල නිධන් වස්තුවක් වශයෙන් කේශ ධාතු ඉල්ලගෙන ඇවිත් තමයි ගිරිහඩු සෑය හදල තියෙන්නෙ.
ඇරත්, කුවේණි කියන තැනැත්තිය කපු කටිමින් හිටිය බවක් තමයි සඳහන් වෙන්නෙ. ඒ කියන්නෙ යම් යම් කර්මාන්තාදියට පුහුණු වූ ජන කොටසක් ලංකාවෙ හිටියයි කියන එකනෙ.
ඒ වගේම තවත් ඇතැම් අය විශ්වාස කරනව සිංහල ජාතිය ආරම්භ වුනේ එයිට වඩා බොහෝ අතීතයේ බව සහ රාවණා රජ්ජුරුවො කියල කියන්නෙ සිංහල රජ කෙනෙක්ය කියල. හැබැයි රාවණා ගැන අපට තියෙන එකම සාක්ෂිය ක්‍රිස්තු පූර්ව 500 – 600 කාලයේදී වාල්මිකී විසින් ලියන ලදැයි සැළකෙන රාමායණය නමැති ග්‍රන්ථය පමණයි.
සමහර අය තර්ක කළත්, ලංකාවෙ තියන රාවණාගොඩ, රාවණා ඇල්ල වගේ ස්ථාන නාම වලින් රාවණා කියල රජ කෙනෙක් හිටිය බව ඔප්පු වෙන්නෙ නෑ. වාරියපොල කියල ගමක් තිබුනට දඬුමොණරයක් තිබුන කියල ඔප්පු වෙන්නෙ නෑ.
රාමායනයෙන්ම රාවණා ගැන දැනගත්ත අය රාවණා සිංහලයෙක්, අපේ එකෙක් කියල හිතාගන රාමායනය කියන්නෙ ඉතිහාසය විකෘති කරන ග්‍රන්ථයක් කියල කියන එක කොහෙත්ම තාර්කික නෑ.
මේ පිළිබඳ සංවාදය තව කාලාන්තරයක් ඉදිරියට ඇදෙද්දි, අද මගේ ලිපියෙන් අදහස් කළ දේ කියන්නම්.
මං මුලින් සඳහන් කරපු ඊ මේල් එක මෙන්න මෙහෙමයි.
මා දන්නා පරිදි ජේසු තුමන් බෞද්ද ශ්‍රාවකයෙකි. මුස්ලිම් ආගමේ ඔහුව ඊසා නමින් හදුන්වන්නේ යෝනක දේශය සමග එදා තිබුණු බෞද්ධ සම්බන්දකම් නිසාය. මක්කාවේ තිබුණු පන්සල් කඩා දමා සංඝ ඝාතනයක් සිදුවන මොහෙතේ අශෝකරජතුමා චතුරංගනී සේනාවක් සමග කාන්තාරය හරහා යෝනකදේශයට යාමට තැත් කලමුත් කාලගුණික තත්වය ඔහුට හරස් විය. මෙය කුරානයේ ලියවී ඇත්තේ වෙනත් අයුරකිනි. ඒ කබාව විනාශ කිරීමට පැමිණි සේනාවන් දෙවියන් විසින් විනාශ කර දෑමු බවයි. මේ ඉතිහාසයට වසර 1433 කි .
හිතෝපදේශයේ  ඇත්තේ සහමුලින්ම දම්ම පදයේ අනුවර්තනයකි. උදාහරණයක්‌ ලෙස බලන්න: කඩිසරයා දඩයමින් ගත් දෙය පුළුස්සා ගනී, අලසයා දාස බවට පත් වන්නේය. කඩිසරයාගේ අත් ආණ්ඩු කරන්නේය, අලසයා ශේවෝල(මිනීවල ) කරා යන්නේය. හිතෝපදේශය:
අප්පමාදෝ අමත පදං -පමාදෝ මච්චුනෝ පදං, අප්පමන්තා න මියන්ති - යෙපමන්තා යතා මතා. ධම්මපදය:
අප්‍රමාදව කටයුතු කරන්න- පමාවුවන්  මළවුන් වැනිය.
එදා බෞද්ධයෙකු වූ ජේසු තුමන්ව ඝාතනය කිරීමට මුල්වූ පල්ලිය අද බෞද්ධ ඉතිහාසය ඝාතණය කිරීමට මුල්වී ඇත.
නොපමාව කටයුතු කරමු...........................විද්වත් ඔබට ශාසන ඉතිහාසය පිළිබද කතිකාවකට ඇරයුම්.
ජාතියක් ලෙස නැගී සිටින්න සියල්ලන්ගේ නැණස පහදවමු.
550
ජාතක පොතේ වීර්ය පාරමිතාව පුරන බෝසතුන් කරවූ ලිද අදත් මදීනාවේ ඇත.
යෝනක දේශයෙන් පැමිණි බුද්ද ශ්‍රාවකට කමටහන් දෙන මොහෙතේ බුදුරදුන් ඇසු පැනයන් මතකද ?
යෝනක දේශයේ වැලිතලාවක තැබූ ශ්‍රී පතුල  වට කර අද තිබෙන්නේ කුමක්ද?
මළවුන්ගෙන් නැගිටුන ජේසු තුමන්, මරියා සමග ඉන්දියාවට පැන ගියාද?
ඉන්දියාවේ සොහොනකින් මතු වූ ඇන ගැසීම නිසා අස්ථි බිදීමකට ලක්වුන මිනිස් ඇට සැකිල්ල හා ඒ අසලින්ම හමුවුන ගැහැණු ඇටසැකිල්ල කාගේද?
රාවණ රජතුමා බෞද්ධයෙකු බව ඔබ දන්නෙහිද?

ඉතින් මට ගැටළුවක් ඇති වුනා මෙහෙම.
රාමායණයේ හැටියට රාවණා රජතුමා ජීවත් වෙලා තියනව කියන්නෙ හින්දු ආගමේ කියැවෙන දෙවියන් මහ පොළොවෙ ඇවිදපු කාලෙ. ඒ කියන්නෙ බුද්ධ කාලයට බොහොම පෙර. එතකොට කොහොමද රාවණ රජතුමා බෞද්ධයෙක් වුනේ?
(සිද්ධාර්ථ කුමාරොත්පත්තිය ක්‍රිස්තු පූර්ව 563දී සිදු වූ බවයි ඉතිහාසයේ සාක්ෂි අනුව කියැවෙන්නෙ)
මේ ගැන කල්පනා කරමින් ජාලයේ කරුණු හොයද්දි ලැබුන තව ලිපියක්.
ඒ ලිපියෙ හැටියට රාජණා රජතුමා ඉඳල තියෙන්නෙ සීගිරිය ගල උඩලු. ඒ විතරක් නෙවෙයි, කැටපත් පවුරත් තිබිල තියෙනව ඒ වෙනකොට සීගිරියෙ. (හැබැයි මේ ලිපියත් රෙෆරන්ස් දෙන්නෙ රාමායණයටමයි.)
එතකොට කැටපත් පවුර හදවපු කාෂ්‍යප රජ්ජුරුවන්ටත් පස්සෙද රාවණා රජ්ජුරුවො හිටියෙ?
අපේ හිතින් මවාගත්තු කතන්දර, අනුමාන, වෙන්නත් පුළුවන් නොවෙන්නත් පුළුවන් දේවල්, මේ ආදී අහඹු කරුණු උඩ ඉතිහාසය ගැන නිගමන වලට එන්න බැහැ. ඒකට පුරාවිද්‍යාත්මක සාක්ෂි අවශ්‍යයි. ජාතියක ආරම්භය ගැන නිශ්චිතවම හොයන්න පුළුවන් කමක් නැහැයි කියන එකයි මගේ මතය. ඒක ගංගාවක් පටන් ගන්න තැන හොයන්න යනව වගේ වැඩක් වේවි. මොකද, ජාතියක් පටන් ගන්නෙ මුහුරත් උළෙලක් එහෙම පවත්වලා ගිවිසුමක් ගහල ව්‍යවස්ථාවක් සම්මත කරගෙන එහෙම නෙවෙයිනෙ.
(මතු සම්බන්ධයි)

2012-02-21

ප්‍රාදේශීය භාෂා

අපි සිංහල කතාකරනව තමයි. ඒත් මේ සිංහල භාෂාව වර්ග හැතැප්ම විසිපන්දාහක් පමණ වූ මේ කුඩා දිවයිනේදී ප්‍රාදේශීය වශයෙන් කොතරම් වෙනස් වෙනවාදැයි හිතල බැලූ විට, ලෝකයේ මේ තරම් භාෂාවන් ගණනක් තිබීම කිසිසේත්ම පුදුම වීමට කාරණාවක් නෙවෙයි.
මේ සම්බන්ධයෙන් පොත් පත් සහ වෙබ් අඩවි ගණනාවක්ම තියෙනවා. ඒවා සංස්කරණය කරල තියෙන්නෙ බොහොම මහන්සියෙන් තොරතුරු එකතු කරල වෙන්න ඕනෑ. ඒත් ඒ කිසිම පොතක අදාළ හැම වචනයක්ම තියෙනවාය කියල සහතික වශයෙන්ම කියන්න පුළුවන්කමක් නෑ. ඉතින් ඒ විවිධ පොත් සහ වෙබ් අඩවි හෝ බ්ලොග් පෝස්ට්ස් තිබුනත්, මට පොඩි අදහසක් ආවා මෙන්න මෙහෙම.
මේ ගැන එක බ්ලොග් එකක් ඇරලා, කමෙන්ට් කරන්නට ඉඩ තියමු.
එතකොට කවුරු කවුරුන් හෝ තමන් දන්න දේ ලියල කමෙන්ට් කරයි. අවසානයේදී කාටත් ප්‍රයෝජනවත් හොඳ එකතුවක් හදාගන්න හැකි වේවි.
 

2012-02-20

ඒ අනුව අධ්‍යාපනය හැදෑරීමේ ප්‍රශ්නාර්ථය කුමක්ද?

ඒ අනුව අධ්‍යාපනය හැදෑරීමේ ප්‍රශ්නාර්ථය කුමක්ද?
මේ පෝස්ට් එක ලියන්නෙ ලෝක සම්මතයට එරෙහි වෙනව කියල හෙළුවැල්ලෙන් යන්න හදන, පයින් යනකොට මහ පාරෙ වම්පැත්තෙන් යන්න හදන, හන්දි වල තියෙන ට්‍රැෆික් ලයිට් වල රතු පාට පත්තු වෙලා තියෙද්දි කඩා ගෙන යන්න හිතන, කහ ඉරක් ඇඳල තියෙද්දි වෙනත් තැන්වලින් පාර හරහ පනින්න හදන, විකාර මනසක් සහිත අයටවත්, ඊට පොඩ්ඩක් විතර අඩු මට්ටමේ ලෙඩක් කියල හිතන්න පුළුවන් ආබාධයක් වන සම්මතයට එරෙහිව ලිවීම කියන රෝග තත්වයෙන් පීඩා විඳින අයටවත් කියවන්න එහෙම නෙවෙයි කියල මුලින්ම කියන්න වෙනවා.
ලියනවා කියල කියන්නෙ සන්නිවේදන ක්‍රමයක්. ඒ කියන්නෙ තමන්ගෙ අදහස තවත් කෙනකුට සීයට සීයක් හරියටම දැනුම් දීමට යොදාගන්නා උපක්‍රමයක්. මානව සංහතිය ආරම්භයේ සිටම වගේ මිනිසා විසින් සාර්ථක ලෙස භාවිතා කළ හැකි සන්නිවේදන ක්‍රම අත්හදා බලා ඇති බවට සාක්ෂි තිබෙනවා. මං එහෙම කියන්නෙ සතුන් පවා සන්නිවේදන ක්‍රම අනුගමනය කරන බව සොයාගෙන තිබෙන නිසා.
මුල් කාලයේ මිනිසා භාෂාව නිපදවා ගත්තත්, ඇසෙන මානයේ සිටි අය හැරෙන්නට අනිත් අයට යමක් දැනුම් දීමට හැකියාවක් තිබුනෙ නැහැ. ඒත් සිරිත් සම්මත වශයෙන් යම් යම් දේ ඔවුනට පුරුදු වෙලා තියෙන්න ඇති. සම්මතයට එරෙහි ‍වන එවුන් එක දවසෙන්ම කම්බස් වෙන්නත් ඇති ගෝත්‍ර නායකයා අතින්.
මට මේ ලිපිය ලියන්න හිතුනෙ අද ජාතික පුවත්පතක පළවෙලා තිබුනු ලිපියක් කියවීමෙන පස්සෙ. මේ ලිපිය මොකක්ද කියල ලින්ක් එකක් දාන්න මං කැමති නැහැ. ඒක මගෙ ශරීර ‍සවුක්කියට පරහක් වෙන්න ඉඩ තියෙනවනෙ. අනිත් එක, කවුරුත් දන්නව ඇතිනෙ අශ්ව රේස් දාන්න බූරුවෙක් මිලට ගත්ත පාදිළි උන්නාන්සෙට වෙච්ච වැඩේ. ඒ නිසා පත්තරකාරයෝ තරහ කරගන්නෙ නැතුව එයාල අතින් සිද්ද වෙන වැරදි හදවගන්න තමයි උත්සාහ කරන්න ඕනැ.
මං මේ කියපු ලිපියෙ තිබුනු ඡේද වලින් දෙක තුනක් ඇරෙන්න අනිත් ඔක්කොම වගේ පටන් ඇරගෙන තිබුනෙ ඒ අනුව කියන යෙදුමෙන්. මෙහෙම ලියන්නෙ ඒ පත්තරේ විතරක් නොවෙයි කියන එකත් ඒ පත්තරේ තියෙන හැම ලිපියක්ම මේ වගේ වැරදි වලින් ගහණ ඒවා නොවන බවත් අවධාරණයෙන්ම කියන්න ඕනැ.
දැන් අපි බලමු මොකක්ද මේ ඒ අනුව කියන්නෙ කියල.
සිංහල භාෂාවෙ සමහර වචන තියනව අවධාරණය සඳහා හෝ අලංකාරය සඳහා යොදන. මිනිසා වූකලී දියුණු මනසක් සහිත සත්වයෙකි කියන වාක්‍යය වූකලී කියන වචනය නැතුව ලියන්නත් පුළුවනි. ඒ වුනත්, ඒ වචනය හෝ ඊට සමානවම යෙදෙන වනාහි කියන වචනයත්, කථා කරන භාෂාවෙදි භාවිතා වන ඇවිල්ල කියන වචනයත් වාක්‍යයකට යෙදුනම ඒ වාක්‍යයෙන් කියවෙන දේ ටිකක් බරසාර වෙනව. දැන් බලන්න මෙහෙම කිව්වම කොහොමද කියල. සිරිපාල ඇවිල්ල සත පහකට විස්වාස කරන්න බැරි පුතය. ඔය වාක්‍යයම කියන්න පුළුවන්නෙ සිරිපාල සත පහකට විස්වාස කරන්න බැරි පුතය කියල.
ඒ වචනය එහෙම වුනත්, ඒ අනුව කියන වචනයනම් එහෙම වචනයක් නෙවෙයි. ඒ අනුව කියල කියන්න පුළුවන් වෙන්නෙ, යම් ලිපියක පළමුවැනි වාක්‍යයෙන් හෝ දෙවැනි වාක්‍යයෙන් විස්තර කරපු දෙයක ප්‍රතිපලය හැටියට සිද්ද වෙන හෝ සිද්ද වුනු දෙයක් ගැන කියද්දි පමණක්මයි. ඒ කියන්නෙ මෙන්න මේ වගේ දෙයක්.
අද මධ්‍යම රාත්‍රියේ සිට පිටි කිලෝ ග්‍රෑම් එකක මිල රුපියල් පහකින් වැඩි කිරීමට තීරණය කර තිබේ. ඒ අනුව හෙට උදේ සිට පාන් රාත්තලක මිල රුපියල් දෙකයි පනහකින් වැඩි වනු ඇත.
අනේ ‍එහෙම වෙන්නනං එපා, උදාහරණයක් හැටියටයි කිව්වෙ.
ඒකෙදි මං ඒ අනුව කියන වචනය පාවිච්චි කරල තියෙන්නෙ පාන් රාත්තලේ මිල වැඩි වීමට පිටි මිල වැඩි වීම හේතුවක් වන නිසායි.
දැන් කවුරුහරි මෙහෙම කියනවනං මොකද වෙන්නෙ බලන්න.
අද මධ්‍යම රාත්‍රියේ සිට පිටි කිලෝ ග්‍රෑම් එකක මිල රුපියල් පහකින් වැඩි කිරීමට රජය තීරණය කර තිබේ. ඒ අනුව වෙළඳ අමාත්‍යාංශය විසින් සියළුම වෙළෙඳ ශාලා ඉදිරිපස මිල දර්ශනයක් එල්ලා තිබිය යුතු බව නිවේදනය කරයි.
පිස්සු නේද?
මට විස්තර කරන්න අවශ්‍ය දෙවැනි කාරණය නම් අධ්‍යාපනය හැදෑරීමයි.
අධ්‍යාපනය යනු කුමක්ද? අධ්‍යාපනය යනු ඉගෙන ගැනීම ය. ප්‍රාථමික අධ්‍යාපනය යනු කුඩා දරුවන්ගේ ඉගෙන ගැනීම ය. ද්විතීයික අධ්‍යාපනය, උසස් අධ්‍යාපනය ආදී වශයෙන් හඳුන්වනු ලබන්නේ පාසැලක ඉහළ පංතිවල දරුවන්ගේ සහ පාසල් අධ්‍යාපනය හමාර කළ දරුවන්ගේ ඉගෙනගැනීම ය. ලිංගික අධ්‍යාපනය යනු ලිංගික කාරණාවන් ගැන ඉගෙන ගැනීමය. අධ්‍යාපන අමාත්‍යාංශය තිබෙන්නේ ඉගෙන ගැනීම ගැන තීන්දු තීරණ ගැනීමටයි.
හදාරණවා යනු ඉගෙන ගන්නවා යන්නට සමාන වචනයකි. ලොකු මාමාගේ පුතා වෛද්‍ය විද්‍යාව හදාරන්නේ දොස්තර කෙනකු වීමටය. අක්කා නීතිය හදාරන්නේ පෙරකදෝරුවෙකු වී අසරණයන් ගසා කෑමටයි.
ඉතින් අධ්‍යාපනය හදාරනවා කියන්නේ කුමක්ද?
අධ්‍යාපනය ලබාගන්නවා කියා හෝ ශිල්ප ශාස්ත්‍ර හදාරණවා කියා කීම නිවැරදි ව්‍යවහාරය නේද?
වතුර නානවා කියා මිසක් නෑම නානවා කියා කියන්නෝ සිටිත්ද?
තුන්වැනි කාරණාව ප්‍රශ්නාර්ථයයි.
අළුත් අධ්‍යක්ෂ ජනරාල්වරයාට සිංහලෙන් ලියන්න බැරි වීම ප්‍රශ්නයකි.
එය ප්‍රශ්නාර්ථයක් ද?
ප්‍රශ්නයක අර්ථය දැක්වීමට යොදාගන්නා ලකුණ ප්‍රශ්නාර්ථ ලකුණයි. වාක්‍යයක් දුටු විට එය ප්‍රශ්නයක් බව වහා හැදිනගැනීමට ප්‍රශ්නාර්ථ ලකුණ උපකාරී වේ. මෙලෙසම විෂ්මයාර්ථ ලකුණක් ද ඇත. මේ ලකුණු හරියට යෙදීමට උගන්වා නොතිබීම විශ්මය‍‍ාර්ථයක් ද?

ටොයිලට්

කවුරු කවුරු හරි සිංහල බ්ලොග් අවකාශය තුළ පෝස්ට් කීපයක්ම දාල තිබුන චූ (සහ කක්ක) ගැන. ඒ පෝස්ට් වල බොහොම බර සාර කරුණු කාරණා අඩංගු වෙලා තිබුන වගේම සමහර පෝස්ට් කියවද්දි දැනෙන චූටි කිචිය වගේ එකක් ඇරුණහම වෙන මෙලෝ දෙයක් ගන්න තිබුනෙ නැති ඒවත් කියවන්න ලැබුන.
හැබැයි මට දකින්න ලැබුනෙ නැහැ තවමනම් ටොයිලට් ගැන පෝස්ට් එකක්. ඒ වුනාට චූ කියපුවහම ටොයිලට් අමතක කරන්න බෑනෙ අද කාලෙ. හැබැයි ඉතින් මේක වැදගත් වෙන්නෙ ජනාවාස වූ පළාත් වලට විතරයි. කිලෝ මීටර් එකක් යනකොට ගෙවල් හතරක් පහක් විතරක් දකින්න ලැබෙන පළාතකදිනම් ටොයිලට්වලට ලැබෙන්නෙ බොහොම අඩු වටිනාකමක්.

හැබැයි ඉතින් මොකක් හරි කානිවල් එකක් වගේ කේස් එකක් තියෙනකොට, එහෙම නැත්නම් පළාතම ජනාකීර්ණ බවට පත්වෙන කාලයකදි හරි අවස්ථාවකදි හරි ටොයිලට් ගැන වැඩිපුර හිතන්න වෙනව. නුවර පෙරහැර කාලෙට, සිරීපාදෙ යන කාලෙට, කතරගම පෙරහැර කාලෙට (නැතත් කතරගමනම් හැමදාම සෙනග වැඩියිනෙ.) බොබයිල් ‍ටොයිලට් තියනවනෙ දැන්නං. ඔන්න දැයට කිරුළ බලන්න ගිය අයට බොහොම වටිනා කියන ටොයිලට් එකක චූ කරන්න ලැබුන කියල මට ඇහුණ විරුද්ධ පක්ෂේ කට්ටිය බෙරිහන් දෙනව.
අද මේ කතා කරන්න හදන්නෙ ටොයිලට් සම්බන්ධයෙන් ගොඩක් දෙනකුට මුහුණ පාන්න වෙන ගැටළුවක් ගැන. මේක තාවකාලික නිසා අමුඩයක් ගහගන්න තමයි අපේ ගොඩක් අය පුරුදු වෙලා තියෙන්නෙ. කතන්දරේ පැහැදිළි කරගන්නනං පල්ලෙහා තියෙන පින්තූරෙ දිහා ටිකක් බලල ඉන්න.


මේ පින්තූරෙ තියෙන්නෙ ජල මුද්රිත වැසිකිළි කියල අපි හඳුන්වන වැසිකිලියක්. ඕක නම් අර සුද්දන්ගෙ ටයිප් එකේ එකක්. ඒ කියන්නෙ ෂපාන් එකේ ඉඳගෙන තමන්ගෙ කටයුත්ත කරගන්න පුළුවන් වර්ගයේ එකක්. ඉන්දියාව, ලංකාව ඇතුළු ජපානය දක්වා තියෙන පෙරදිග රටවල දකින්න හම්බවෙන “ඇණ තියාගෙන” ඉඳගන්න වර්ගයෙ ඒවත් මේ සිද්ධාන්තයෙන්ම තමයි වැඩ කරන්නෙ.
මේකෙ තියන වටිනාකම තමයි, අර කොමඩ් එක පතුලෙ හැම වෙලාවෙම රැ‍ඳිල තියන අර නිල් පාටට ඇඳලා තියෙන වතුර ටික නිසා, කක්ක එකතු වෙන වැසිකිළි වලේ දුර්ගන්ධය බටේ දිගේ එළියට එ‍න්නෙ නැති එක. ඉතින් ඒ නිසාම, ලෙඩ රෝග පැතිරීමේ අවදානම අඩු වෙනව කියන එකත් පැහැදිළි‍යිනෙ.
සාමාන්‍යයෙන් ඔය කක්ක වලවල් ලේසියෙන් පිරෙන්නෙ නෑ. ඒකට හේතුව තමයි, කක්ක කියන ජාතිය සිලි සිලි බෑග් වගේ නොදිරා තියෙන්නෙ නැති එක. හැබැයි මේ වැසිකිළි වලකට සබන් වතුර ගියොත්නම් වැඩේ කෙළවෙනවා. ඒ කියන්නෙ දිරා යාම නවතිනවා. ඒකට හේතුව තමයි, සබන් නිසා අර “දිරා යාම” ඇති කරවන බැක්ටීරියා වර්ග විනාශ වීම. අනිත් අනතුර තමයි නොදිරන දේවල් වැසිකිළි වල තුළට දැමීම. ඒකෙන් එන ක්ෂණික විපාකයක් තමයි අර වංගු සහිත බටේ බ්ලොක් වෙන එක. බ්ලොක් එක තල්ලු කරල ක්ලීන් කරගත්ත වුනත්, වලේදි ඒක දිරන්නෙ නැති නිසා, සෑහෙන පාඩුවක් සිද්ද වෙනව.
මම මේ පෝස්ට් එක ලියන්න කල්පනා කළේ ඔය කවුරුත් දන්න කතන්දර කියන්න නෙවෙයි.
මං ඔය පින්තූරෙ ලා කොළ පාටට ඇඳල තියෙන්නෙ සාමාන්‍යයෙන් වාතය තියෙන කොටස. අපි අළුතින් වතුර එකතු ‍කරනකොට ඒ වාතය පොළවට, පස් අතරට යනවා. වැසිකිළි වලවල් සාමාන්‍යයෙන් කපරාරු කරන්නෙ නැත්තෙ ඒකයි. වාතය විතරක් නෙවෙයි වතුරත් පසට උරා ගන්නවා. ඝන කොටස්, ඒ කියන්නෙ කක්ක, අර මම ඉස්සෙල්ල කිව්ව වගේ බැක්ටීරියාවන් විසින් අනුභව කරනු ලබනවා.
ඉතින්, පොළවෙ ජල මට්ටම තරමක් ඉහළ තියෙන පළාත් වල එක දිගට වහිනකොට ඔය ටොයිලට් වලවල් ඇතුළට වතුර උනන්න ගන්නව. එහෙම උනල උනල අර වැසිකිළියෙ ඉඳල වලට එන බටේ කට වැහෙනව. වැහුනට පස්සෙ ඒ බටේ ඇතුළේ තියන වාතයට පිට වෙන්න හැටියක් නෑ. ඉතින් අපට හිතෙන්නෙ වැසිකිළි වළ සම්පූර්ණයෙන් පිරිල කියල. ඒ වුනත් වලේ තව ඉඩ තියෙනව. වතුර බහින්න විදියක් නෑ වාතය පිරිල නිසා බටේ ඇතුළෙ. ඉතින් අපි කරන්නෙ දවස් දෙක තුනකට, වැස්ස පායලා පොළව වේලිලා යනකන් මොකක් හරි විකල්පයක් හොයාගෙන දුක් විඳින එක.
ඉතින් මේක වළක්වගන්නනං කරන්න තියෙන්නෙ බටේ වල ඇතුළෙන් පහළට යවන්නෙ නැතුව පුළුවන් තරම් ඉහළකදි නවත්තගන්න එක. එතකොට වල සම්පූර්ණයෙන්ම පිරෙනකන් වුනත් අපට පාවිච්චි කරන්න පුළුවන්.
වැසිකිළි හදන බාස් උන්නැහෙලා ඒ පැත්ත හිතන්නෙ නෑ. එයාල හිතන්නෙ උඩ ඉඳන් පහළට වතුර වැක්කෙරෙන්න ගත්තහම වල ඇතුළේ තව වලක් හෑරෙන්න පුළුවන්, නැත්නම් වලේ ඉවුරු කැඩිල යන්න පුළුවන් කියල. එහෙම වෙනවනම් ඒකට වෙන මොකක් හරි සිස්ටම් එකක් දාගන්න පුළුවන් ලේසියෙන්ම. එහෙම නැත්තං අඩු වශයෙන් බටේ උඩ හරියෙන කුඩා සිදුරක් හරි හදල තිබුනනං ඔය එයා ට්‍රැප් වීම සිද්ද වෙන්නෙ නෑ.

2012-02-18

වැඩියෙන්ම බය කවුද?

මිනිසුන් වැඩියෙන්ම බය වෙන්නෙ මොනවටද?
ඔබ දන්නවනේ සමහර අය කැරපොත්තන්ට බයයි. සමනළයන්ට බය අයත් ඉන්නවා. මකුළුවන්ට, බල්ලන්ට, සර්පයන්ට (මේ කියන්නෙ විෂ සහිත සර්පයන් අත පාත ගාන්න බය වෙන එක නෙවෙයි, සර්පයෙක් දැක්කම ඒකා කාට හරි දෂ්ට කරන එක වළක්වා ගන්න උත්සාහ කරනව වෙනුවට, පළාතෙ ඉන්නෙ නැතිව දුවන එක ගැන) සමහර අය දක්වන්නෙ පුදුමාකාර බයක්. ඒ වගේම සමහර අය පව් කරන්න බයයි, හොරකම් කරන්න, බොරු කියන්න බයයි. ඒත් සමහර අය බය නැතුව බොරු කියනව. මේ අතරෙ බය නිසා නොව පිළිවෙතක් වශයෙන් බොරු නොකියන, හොරකම් නොකරන අයත් ඉන්නව.
ඇතැම් මිනිසුන් පොලීසියට දක්වන්නෙ පුදුමාකාර බයක්. කුඩා කාලයේ ගෝනි බිල්ලන්ට බයගැන්වීම නිසා සමහරු වැඩි වියට පත් වුනාමත් මිනිසුන්ට මුහුණ දෙන්න බයයි. ඒත් මේ බය කියන දේ සත්වයාට ස්වභාවයෙන්ම ඇති වෙන දෙයක් ආත්මාරක්ෂාව සඳහා. (ආහාර, නින්ද, බිය සහ මෙවුන්දම සියළු සත්වයන්ට පොදු අවශ්‍යතා හැටියටයි පැරණි සංස්කෘත ශ්ලෝකයක සඳහන් වන්නේ)
ඉතින්, සමස්තයක් වශයෙන් ගත්තහම මිනිසුන් වැඩි දෙ‍නකු බයක් දක්වන්නේ මොකටද කියන එක හොයන්න උනන්දුවක් දක්වපු පර්යේෂකයන් විසින් යම් යම් මතවාදයන් ඉදිරිපත් කරල තියෙනව.
ඒ වගේම, විවිධ දේවල් ලැයිස්තු ගත කරල තියෙනව ඇතැම් අය විසින්. බොහෝ විට ඒ ලැයිස්තුගත කිරීම් කරන්නෙ ඔවුන් විසින් කරනු ලබන පර්යේෂණ, සමීක්ෂණ එහෙම නැත්නම් රිසර්ච් වැඩ ආශ්‍රය කරගෙන, ඒවායේ දත්ත උපයෝගී කරගෙන.
ඒ වගේ එක පොතක් තමයි මේ.
මේ පොත පළමුවෙන්ම ප්‍රකාශයට පත් කරල තියෙන්නේ 1977දී. ඒ පොතේ තියෙන එක් ලැයිස්තුවක් තමයි, මිනිසුන් විසින් වැඩියෙන්ම බයක් දක්වන්නේ මොනවටද යන්න.
ඒ ලැයිස්තුවේ හැටියටනම්, මිනිසා වැඩිම බයක් දක්වන්නේ සමූහයක් ඉදිරියේ කථාවක් පැවැත්වීමට. හැබැයි මේක ලංකාවට අදාළ වෙයිද කියලනම් සැකයි අපේ දේශපාලන සත්ව කොටස් දිහා බලපුවාම. ඒ කෙසේ වුවත්, පාසැල් යන දරුවන් සමිතියේ කථිකෝදය සමිතියේ සභාපති හරි ලේකම් හරි වෙන්න, එහෙම නැත්නම් සමිති වාරයකදී කතාවක් පවත්වන්න, ගීතයක් ගායනා කරන්න පැකිලෙනබව නම් අපේ අත්දැකීමක්.
මිනිසා දෙවැනියට බයක් දක්වන්නේ උස් ස්ථාන වෙත යාමට කියලයි ලැයිස්තුවෙ සඳහන් වෙන්නෙ. මේ උස් ස්ථාන කියන්නෙ රැකියාවේ ප්‍රමෝෂන් එහෙම නෙවෙයි ඕං. උස ගහකට, ඉණිමගකට නගින්න හරි එහෙම නැත්තං ගැඹුරු ගංගාවකට උඩින් දාල තියෙන වැල් පාලමක්, කම්බි පාලමක් නැත්තං බිම බලපුවහම ගැඹුර පෙනෙන විදිහට තියෙන පාලමක් උඩින් යනකොට සමහර අයගෙ කකුල් දෙක වෙවුලනවා.
තුන්වැනි ස්ථානය හිමිවන්නේ කෘමීන්ට.
හතරවැනි ස්ථානය මූල්‍යමය ගැටළු. (මොබයිල්මෑන් නම් වැඩියෙන්ම බය ඒකටද කොහෙද) මාසෙ පඩිය වෙලාවට ගන්න බැරිවෙන ගැටළුවක් ආවොත් මොකක්ද කරන්නෙ, දිවි නසා ගන්නවා ඇරෙන්න.
පස්වැනියට මිනිස්සුන්ව බය කරන්නෙ ගැඹුරු ජලාශ. හැබැයි පීනන්න දන්න අයට මේක ගණනක් නැතුව ඇති. සමීක්ෂණය කළේ කාන්තාරෙකදිද දන්නෙ නෑ.
හයවැනි ස්ථානය අසනීප වලට හිමි වෙනව. (ඒකෙනුත් හෙම්බිරිස්සාවට තමයි මොබයිල්මෑන් වැඩියෙන්ම බය. මතක් වෙනකොටත් අප්පිරියයි. චුරුස් චුරුස් ගගා. නාන්නත් නෑ. කන්නත් බෑ ඒත් බඩගිනි එනව කෙළවරක් නැතිව.)
අපට පුදුම හිතුනත් මරණයට හිමි වන්නේ හත් වැනි ස්ථානයයි. ඒ කියන්නෙ ඉහත හේතු හයෙන් එකක් නිසා කෙනෙකුට තීරණය කරන්න පුළුවැනි සිය දිවි නසාගන්න.
අටවැනි ස්ථානය දී ඇත්තේ පියාසර කිරීමටයි. මෙහිදී අදහස් කරන්නට ඇත්තේ ගුවන් යානයක ගමන් කිරීම විය යුතුයි. ඇත්ත, අපේ ලංකාවෙනම් මහපාරක බයිසිකලේකින් යාම හෝ පයින් ගමන් කරමින් කහ ඉර මතින් පාර පැනීම ගුවන් යානයක යාමට වඩා කීප ගුණයකින් අනතුරුදායකයිනෙ.
නමවැනි ස්ථානය හුදකලා වීම.
දහය තමයි බල්ලට හම්බ වෙන ස්ථානය.
එකොලෙස් වැනි ස්ථානය දීල තියෙන්නෙ කාර් එකක යාම හෝ කාර් එකක් පැදවීම. මේකනං වෙන්න ඇත්තෙ අදාළ සමීක්ෂණයට ලංකාවෙ අය සහභාගි නොවීම කියන එක මොබයිල්මෑන්ට නං පැහැදිළියි.
දොළොස්වැනි ස්ථානය අඳුරට හිමිවෙනව. දොළොස්මහේ පහන දල්වලා අපේ අයට පුළුවනි ඒකෙන් ගැලවෙන්න.
දහතුන්වැනි ස්ථානය විදුලි සෝපාන (Elevators) වලටත්, දා හතරවැනි ස්ථානය පාවෙන පඩිපෙලවලටත් (Escalators) හිමි වන බවයි ඉහත කී පො‍තේ දැක්වෙන්නෙ.
ඉතින් ඔබත් මේ ලැයිස්තුවේ කොතනක හරි ඉන්නවද බලන්න.

2012-02-14

වැලන්ටයින්ගේ දිනය සැමරීම

වැලන්ටයින් දිනය ගැන කරුණු ටිකක් හොයනකොට මෙන්න තියනවා වැලන්ටයින් දිනය සැමරීමට විරුද්ධ වෙමු කියල පෝස්ට් එකක්. බලාගෙන ගියාම ඉස්ලාම් ආගමික වැඩක්.
"ඉස්ලාම් අදහන මිනිස්සු ඔවුන්ගෙ පාරම්පරික සිරිත් විරිත් වලට හිරවෙලා ඉන්න ජාතියක්. අපි එහෙමද, අපි වෙනස් වෙන ලෝකෙත් එක්ක ගමන් කරන නවීන සිතුම් පැතුම් සහිත සත්ව කොට්ඨාශයක්ය" කියාගෙන වැලටයින් දිනය සමරන්න කට්ටිය ලෑස්ති වෙන්න ඇති.
වැලන්ටයින් දිනය තියෙන්නෙ අර කොහෙද හිරවෙලා හිටපු සොල්දාදුවෝ කට්ටියකට පෙම්වතියන් හොයල දීල බන්දලා දුන්න ශාන්ත වැලන්ටයින් මුනිතුමා සිහි කරන්නද?
ආදරවන්තයින්ට හැම තැනින්ම හැම දාම ගල් මුල් වදිද්දි උන් වෙනුවෙන් එක දවසක් අවුරුද්දට වෙන් කරල දෙන්න කියල හිතාගෙනද?
කපටි වෙළඳ පැළැන්තියට කොල්ලෝ කෙල්ලො රවට්ටලා ගානක් හොයාගන්න ද?


2012-02-13

සෑම්ගේ අඩවිය / Technology සිංහලෙන්: Nero 9 Portable | 68MB කැමති හැමොම බාගන්න

සෑම්ගේ අඩවිය / Technology සිංහලෙන්: Nero 9 Portable 68MB කැමති හැමොම බාගන්න: මෙන්න මම ඔයාලට Nero 9 Portable මෘදුකාංගය අරගෙන අවා..මම හිතනවා කට්ටිය මේකට කැමති වෙයි කියලා.මමත් මෙක දාගෙන බැලුවා මැක්සා කිසිම අවලක් නැ..ඉති...

2012-02-10

උත්තරාලෝකය Aurora

aurora උත්තරා‍ලෝකය
චමත්කාරජනක වූ උත්තරාලෝකය පිළිබඳ යූ ටියුබයේ තිබුනු වීඩියෝ ක්ලිප් එකක් අහම්බෙන් දැකල මේ ලිපිය ලියන්න හිතුනා.
මේ ලිපිය ලියන්නට අපට කවදත් හිතවත් විකිපීඩියාව උදව් වුනු බව මං නොකිව්වත් කියවද්දිම තේරෙනව ඇති.
http://encyclopedia.thefreedictionary.com/Aurora+(astronomy)
http://en.wikipedia.org/wiki/Aurora_(astronomy)






වීඩියෝ කෑල්ල බැලුවනං පල්ලෙහායින් තියෙන පින්තූර ටිකත් බලන්නකො.


http://upload.wikimedia.org/wikipedia/commons/thumb/a/aa/Polarlicht_2.jpg/120px-Polarlicht_2.jpg